Footer

Suspetsa iti Gongogong slay, nakasuan

SAN ILDEFONSO, Ilocos Sur – Napilaan iti kaso ti maysa a baro a masuspetsa a nangpapatay iti dati a girl friendna bayat ti kaaddada iti rabii ti Pebrero 25 iti maysa a kalapaw iti Barangay Gongogong ditoy nga ili.
Pinilaan dagiti polis ditoy iti kaso a pammapatay ni Michael Donato, residente iti Nambaran, Sto. Domingo, Ilocos Sur, mapapati a dati a boy friend ti biktima a nabigbig a ni Mary Ann Flores, 17, estudiante iti University of Northern Philippines.
Mismo a ti ama ti biktima, kaduana dagiti autoridad ti nakasarak iti bangkay ni Flores iti agarup ala una y media ti malem iti Pebrero 26 iti kaunasan, nasurok a 300 a metro ti kaadayona manipud iti kalapaw nga imbaga ti suspetsa a nangipananna iti biktima.
Iti autopsy report ni Dr. Ronald Tobias, naammuan a nagsagrap ni Flores iti dunor iti baba ti lapayagna ken iti tianna a mapapati a gapuanan ti maysa a “natangken a banag” ken dadduma pay a gasgas iti nadumaduma a paset ti bagina.
Segun ken ni Tobias, posible a ti dunor ti biktima iti puon ti lapayagna ken iti tianna ti puon ti nakatayanna ken posible a ti eskopeta a nasarakan iti asideg ti crime scene ti naaramat a pinangdangran iti biktima.
Kinuna pay ni Tobias a posible a maysa wenno dua a tao ti nangisayangkat iti krimen.
Idi madamag no narames ti biktima, kinuna ni Tobias nga adda old laceration iti hymen ti biktima.
Ngem kinuna ni Tobias a saanna a maibaga no “nagamit” ti biktima iti dayta a rabii ta daan met ti laceration iti hymen ti biktima.
Kinuna ti inbestigador a nagtinnag a ni Donato ti kangrunaan a suspetsa gapu ta inannugotna nga isu ti kadua ti biktima iti dayta a rabii a napan iti bahay-kubo iti kaunasan a paset ti Barangay Gongogong, San Ildefonso, Ilocos Sur.
Iti inisial nga inbestigasion dagiti polis, sinukon ni Donato ni Flores iti balayda iti Bayubay, San Vicente, Ilocos Sur iti agarup alas otso y media iti rabii ti Pebrero 25, napanda nagginom iti Puerto Beach iti Sto. Domingo sada nagturong iti maysa a kalapaw iti Barangay Gongogong, San Ildefonso, Ilocos Sur.
Maysa a kitkitaen dagiti polis ti anggulo a nagkedked ti biktima a makinaig iti suspetsa ket nakiranget a nagtungpal iti pannakapapatayna.
Ngem iti palawag ni Donato iti polis, bayat ti kaaddada ken ni Flores iti kalapaw, maysa a tao a nagtagi-flashlight ken adda iggemna nga eskopeta ti simrek sana inagaw ti selpon ni Flores ken minalo ni Donato babaen ti eskopeta.
Mapapati a nagtaray ni Donato a napan nagpaarayat iti kabalbalayan ket ditoy a nasalamaan dagiti polis nga agpatpatrolia iti nasao a lugar iti dayta a rabii.
Ngem iti interbio ken ni Police Investigator Recaido, naammuan a nagbalin a suspetsa ni Donato idi nakakitada iti tulbek ti motorsiklo a mapapati a kukua ni Donato iti asideg ti bangkay ti biktima.#

Comments are closed.