Footer

Adda kadi pay nabatbati a konsensiatayo?

Adda maobserba toy numo ti biang nga aramid dagiti sumagmamano nga agop-opisina. Adu kadakuada ti sumangpet a masapa, agpirma iti logbook ket kalpasan ti sumagmamano a minutos, rummuardan ket sadanto laengen agsubli inton dandanin panaggawid. Wenno saan, kakumplotda dagiti kaopisinaanda tapno isuda ti mangi-time-in kadakuada tapno agparang a simrekda a masapa. Dagiti dadduma, dida payen agparang. Ngem no sukimatem ti daily time recordda, naikabil dita a presenteda. Adda pay dagiti naglangan iti sumagmamano nga aldaw ngem awan met ti langanda no isumiteda ti Form 48da.

Ti ketdi kinatured dagitoy nga agpalsipika iti Form 48da. Saan ngata a sidiren ida ti konsensiada? Wenno, awanen ti nabatbati pay a konsensiatayo?

Ngem no dadduma, adda met basol dagiti dadaulo wenno pangulo ti opisina a pagtrabtrabahuan dagitoy awanan konsensia a kailiantayo. Ta ania ngarud ket daytoy ti makitkitada nga aramid dagiti dadauloda.

Kas ti maysa a pangulo ti maysa a nasional nga opisina. Masansan a maladaw iti opisinana ta aggapu pay iti sabali a probinsia. Santo nagsapa nga aggawid iti malem. Ngem no sukimatem ti log book, nakasapsapa a sumrek iti opisina ken nakaladladaw nga aggawid.

Adda met dagiti pangulo a managlangan iti opisinada. No kasapulan ti serbisiona, ibaga ti matalek a right handna nga adda iti field wenno adda iti opisial a business. Ngem ti kinapudnona, adda nga agpakpakutibeng iti balayna.

Adda pay dagiti dadduma a superbisor a pagparangenda a napanda nagbisita ket indanto singiren ti nabusbosda kano iti biahe ngem kinaagpaysona, dida met napan iti imbagada a napananda no di ket nagkubukobda gayam iti pagtaenganda.

Adda pay dagiti head of office nga aramatenda ti lugan ti opisinada para iti bukodda a pagimbagan. Adda pay dagiti gundaway nga uray adalemen ti rabii, makitam ti lugan ti maysa nga opisial iti ruar ti maysa nga otel wenno paglinglingayan ken uray iti pallotan. Official business kano. No ania a business, awan la ketdi ti pagimbagan a maitedna iti pagopisinaanna no di pakaburboran iti nakiddit a pondo ti opisina.

Nakuna la ket ngarud ti maysa a gayyemmi iti naminsan: adda kadi pay nabatbati a konsensiatayo?

Agduaduaak pay ketdin no adda pay nabatbati a konsensiatayo. Ta no ipalikmuttayo ti panagkitatayo weno agpaliiwtayo, adu dagiti makitkitatayo a mangop-opisina a sada la mapan kadagiti opisinada no akinse wenno agtapus. Adda pay dagiti agpalpallailang laeng wenno agtututtot wenno agtotong-it iti oras ti panagopisina. Agasem dagiti masaysayang a tiempo. No impaayda koma ti masaysayang nga oras iti panagtrabahoda, di adda koma naiwakasda a mangidur-as iti opisinada!

Intay pay mabasbasa kadagiti pagiwarnak maipanggep dagiti nangangato a turayentayo nga uray agdadatan a nakaaramidda iti maikaniwas, kasda la tekka a kumpet latta iti pagannonganda. Yanna ti baintayo? Napuskol la ketdi ti rupa dagitoy ta dida man la mabain a sumarang kadagiti tattao idinto nga agdadata a nagkunniber, nagtakaw wenno adda inaramidda a pakaibabainan ti opisinada.

(Maigibusto)

 

Comments are closed.