Footer

City sports officials ti DepEd, paayaban ti Konseho ti Vigan

VIGAN CITY – Mapaayaban ti sports coordinator agraman ti schools superintendent ken dagiti coaches ken trainers ti Department of Education City Division ditoy tapno lawlawaganda no apay a nagkutit ti Vigan City iti Ilocos Region Athletic Association Meet a naangay iti Dagupan City idi Pebrero 22-27.

Iti sessionda itay nabiit, binabalaw ni Konsehal Hermenigildo Apelin ti city division ti DepEd ditoy gapu iti nagun-odna a maudi a puesto iti IRAA ket kiniddawna ti idadatag ni City Division Sports coordinator Maribeth Pichay tapno ilawlawagna no ania ti inar-aramidna para iti sports program ti nasao nga opisina.

Inraman met ni Konsehal Benjo Verzosa a mapaayaban ti City Division Superintendent Rizalino Javier ken dagiti coaches ken trainers tapno lawlawaganda no ania ti rason a nagkutit ti Vigan City iti IRAA Meet.

Kabayatanna, kinuna ni Mayor Eva Marie S. Medina a programa ti DepEd ti IRAA ket supsuportaran laeng ti city government idinto nga imballaagna a no saan nga ited ti DepEd City Division ti naan-anay a commitment iti Sports, saan laengen a makipartisipar ti Vigan City iti nasao a rehional a paay-ayam.

Kinuna ni Medina nga inted ti city government amin dagiti kasapulan dagiti atleta ngem no awan ti naan-anay a suporta ti DepEd, kaskasdi a maudinto laeng ti puesto ti Vigan City.

Innayon ti mayora a mapaayaban iti maysa a miting ti city superintendent, ti City sports coordinator ken dagiti coaches ken trainers tapno malawlawagan no ania dagiti nagkurangan ti DepEd City Division ken tapno maiwayat dagiti addang tapno masolbar dagiti problema kanaig iti programa ti sports.

Iti kalkalpas a regional meet, nagkampeon manen ti Ilocos Norte, maikadua ti Pangasinan 2, maikatlo ti Pangasinan, maikapat ti La Union ken maikalima ti Laoag City.

Malaksid dagiti delegasion iti ngato, nakisalip iti IRAA ti dibision ti Ilocos Sur, ken dagiti siudad a pakairamanan ti Alaminos, San Carlos, Urdaneta, San Fernando, Vigan, Candon ken Batac.#

Comments are closed.