Footer

EDITORIAL: Siam ti tawenen ti Tawid News Magasin

Selebraran ti Tawid News Magasin iti daytoy a bilang ti maikasiam a tawen nga anibersariona. Wen, iti laksid ti krisis pinansial a sagsagrapen ti sangalubongan, adda pay la a sitatakder daytoy nanumo a pagiwarnaktayo. Agtultuloy pay laeng a mangidandanon kadagiti kabaruanan a damag iti probinsia ken kabangibangna, kasta met manglinglingay babaen kadagiti sarita ken salaysay a mangitag-ay iti kinatao ni Ilokano.

Dimi magawidan ti tumaliaw iti napalabas, dagiti naglasatan ti Tawid News Magasin bayat ti panagdaliasatna iti siam a tawen iti tay-ak ti panagiwarnak.Nupay makunami nga adu ti rigat ken tibbakol iti dalan, saan a naglibtaw ti Tawid iti linawas nga iruruarna.

Kasta met a sipapannakkelkami a mangibaga a saankami a nagkamtud iti kangrunaan a panggepmi idi iruarmi daytoy a pagiwarnak: mangidanon kadagiti damag iti balanse a wagas ken tumulong iti pannakaidur-as ti Literatura Ilokana ken pannakaasa iti pluma dagiti mannurat nga Ilokano babaen ti panagipablaakmi kadagiti sarita ken salaysay.

Ngamin, kapaliiwanmi nga adda dagiti warnakan ken magasin a no palausen ti manarita ket “agtitipon ti bamban ken alupasi” iti pannakaisurat dagiti padamag, salaysay ken dadduma pay nga artikulo ket no basaen ti maysa a patneng nga Ilokano ken bangolan a mannurat, arigna agannawil gapu kadagiti binatog a saan la ngaruden a nasayud ti pannakaisuratna, saan pay nga umisu ti ortograpiana.

Nakakalkaldaang nga agpayso ngem kapilitan nga annugotenmi nga adda dagiti agiwarwarnak a no palausen ti agsao, naibaonda laeng a gumatang iti suka, nagbalindan a mannurat ken editor iti pagiwarnak.

Mabalin nga adda mapasugkian iti daytoy a paliiwmi, ngem no basaem ti periodiko wenno magasin nga imatmatonan wenno ed-editen dagiti mangibagbaga a napeklan nga Ilokanista, makita ti dakkel a pagkuranganda no maipapan iti panagsurat.

Dayta ti gapuna nga idi inawenmi ti Tawid News Magasin, dagiti maraem ken batido a mannurat iti Iloko dagiti pinilimi nga agsurat. Batido, kunami ta nakaipablaakdan kadagiti nasional a magasin ken adda padasda iti panagiwarnakan.

Makunami a saankami a nagbiddut agsipud ta umad-adu pay dagiti agbasbasa iti daytoy a pagiwarnak nangruna idi rumrummuaren iti internet babaen ti bukodna a website: tawidnewsmag.com

Kas sagutmi kadagiti agbasbasa iti pagiwarnaktayo, ad-adda pay a pinapintastayo ti webpage ti Tawid News Magasin. Saan itan a paatiw iti langa uray kadagiti aginaldaw a pagiwarnak iti pagilian.

Daytoy ti commitment ti Tawid News Magasin kadagiti agbasbasa, ti agtultuloy a panangipaayna iti napimpintas a serbisio tapno agbalin a kangrunaan a babasaen iti Amianan a Luzon.

Iti daytoy a pannakadanon iti maikasiam nga anibersario ti Tawid News Magasin, Dios ti agngina manen kadakayo!

2 Responses to EDITORIAL: Siam ti tawenen ti Tawid News Magasin

  1. Florencio P Cortez March 12, 2009 at 4:01 am #

    Madaydayaw nga mangipabpblaak iti “TAWID NEWS’
    Apo,
    Maysaak kadagiti narway nga agbasbasa dito iti Tawid News ket kayatko nga ipatulod kadakayo nga ka-ayayok unay a basbasaen daytoy nga website.Sakbay nga basaek iti dadduma daytoy ti unaek ta mailiwak la unay ti damag dita Kailokoan kasta met kadagiti kabangibang nga luglugar a kas,Baguio,Pangasinan, Abra ken La Union .
    Agnaedak ngamin ditoy San Francisco, California
    Sapay koma Apo ta mataginayon daytoy nga warnakan.
    Dios ti agnina. ” HAPPY ANNIVERSARY ”

    Toy sidadayaw,

    Florencio P Cortez tubo iti Sta.Cruz, Ilocos Sur

  2. Salvador A. Espejo March 13, 2009 at 12:56 pm #

    Agyamankami iti panagbisbisitayo iti website ti Tawid News Magasin. Maragsakankami ta maidandanonmi dita dagiti padamag manipud ditoy Kailokuan. Kangrunaan a panggepmi a nangirusat iti daytoy a website tapno adda pakabasaan kadagiti kabaruanan a damag ken kasta met a manglinglingay babaen dagiti sarita ken manayonan ti ammo babaen dagiti salaysay.
    Agyamankami manen ket sapay koma ta agtultuloy ti panangsuportayo daytoy nanumo a pagiwarnaktayo ditoy Kailokuan.