Footer

Firing range ti maysa a resort, maar-aramat manen: konsehal

CAOAYAN, Ilocos Sur – Imbutaktak ti maysa a konsehal ditoy a maar-aramat manen ti firing range ti maysa a beach resort iti Barangay Manangat ditoy nga ili.

Kinuna ni Konsehal Rey Cudala nga adda dimmanon kenkuana a pulong a sumagmamano a lawasen a maar-aramat ti nasao a firing range ti Don Juan Resort nga isu manen ti pagam-amkan dagiti residente iti Barangay Caparacadan nga adda maiwawa a bala a sumrek iti pagtaenganda a pakaisagmakan ti biagda.

Napasardeng ti practice shooting iti nasao a firing range ti resort agsipud iti reklamo dagiti agnaed iti Barangay Caparacadan nga adda dagiti bala a naiwawa a simrek iti pagtaenganda.

Segun iti konsehal, mapapati a karaman dagiti polis a dina imbaga no sadino a police station ti mapmapan agpraktis nga agpaltog iti nasao a firing range.

Kabayatanna, impatalged ni kaddutok a hepe ti polis ditoy a ni Police Senior Inspector Zozimo Racho a pakitana no pudno a maar-aramat manen ti nasao a firing range.

Dua a lawas pay laeng a nagtugaw ni Racho kas hepe ti polis ditoy kalpasan ti pannakaiyalis ni dati a hepe, ni Police Senior Inspector Cipriano Rafanan gapu iti panagpetision dagiti sangapulo ket dua a polis iti babaenna.

Iti petision dagiti polis, kiniddawda ti pannakaiyakarda iti sabali a police station gapu iti mapapati a mismanagement ti hepe.

Segun dagiti nagpetision a polis, dida kayat a yuray pay ti pannakapukaw ti respeto dagiti agindeg ditoy kadakuada gapu iti mapapati a saan a nasayaat a liderato ni Rafanan.

Saan a pinatgan ti provincial police office ti petision dagiti polis ngem ti hepe ti naiyalis iti puestona.#

Comments are closed.