Footer

INDAYON NI LAGIP: Ti Binangonko a Pamilia (Maudi a paset)

Wen, pinalubosak manong Danny, ta napintas met ti gagemna iti biag. Asinoak koma a mangipawil iti panangtuntonna iti arapaapna iti biag? Pinabalonak laengen iti pammagbaga ken pammalakad iti panagluasna iti Manila.

Iti panaglabas dagiti bulan, agsasaruno ti panagsuratna a mangkumkumusta kadakami ken ni adingna. Subalitak met a dagus ket no awan ti wayak, ni adingna ti mangsungbat iti suratna.

Kalpasan ti dua a tawen, nagbakasion ni Maricar. Ayna, pimmudaw ken pimmintas ti balasangko iti panaggianna iti Manila. Nakalaglag-an ti garawna.

Idi agsubli iti siudad, nataltalgeden ti riknak a namalubos kenkuana.

Nagtultuloy a nagsurat ken nagipaw-it ni Maricar kadakami. No madanon ti kasangayko, adda latta regalona kaniak. Kasta met ken ni adingna, dina naliwayan a paw-itan iti kasapulanna. Insuratna nga urnongenna dagiti ipawpaw-itna tapno addanto pagadalna. Uray dayta laeng ti maitulongko kenka, sangkasuratna.

Ngem idi kuan, bimmattaway ti panagsuratna. Adu ngata ti trabahona, nakunak iti nakemko. Ngem maysa nga aldaw, nadakamatna iti suratna nga addan kaayan-ayatna. Imbagana pay nga agawidto ket iyam- ammonanto kaniak.

Ngem saan a natuloy ti panaggawid ni Maricar. Nakaawatak laengen iti suratna nga addan iti Bicol, ta ditoyen ti pagnaedanda iti nobiona kalpasan ti panagtarayda.

Idi agkasarda, nakaawatak iti imbitasion, Manong Danny. Kayatmi ti mapan agatendar ken ni Josephine ngem awan met ti pagpletemi. Nagsuratak laengen a nangipeksaak iti kablaawko kadakuada ken maysa a kararag a naragsakto iti denna ti asawana.

Manong Danny, manipud idi nagkasar ti anakko, manmanon ti suratna. Mailiwak kenkuana no dadduma ngem awan ti maaramidak ta adayo ti nakaikamanganna. Nadakamatna iti maysa a suratna a kayatda met nga agassawa ti agbakasion iti Ilokos ngem awan ti gastuenda. Sa maysa, adda kanon anakda.

Manipud idi, saankon a nakita ni Maricar, Manong Danny. Aglalo itan ta adu metten ti anakna.

Iti panangisuratko daytoy, lakayakon, sumagpatakon iti kina-senior citizen. Awan ti nagbaliwan ti panagbiagmi.

No adda man tarigagayko iti daytoy a biag ti pannakakitak koma ken ni Maricar ken dagiti appokok.

Naaklonko metten a saanen nga agsubli pay ni Cely nga asawak. Nadamagko nga adda metten kabbalayna.

Diak pay pulos nakita ni Joy, ti inaudian. Adda kano metten asawana. Mailiwak a makakita kenkuana. Kayatko a maarakup uray apagkanito laeng.

Ni laengen Josephine ti kabbalayko. Balasang pay ngem addan umar-arubayan kenkuana. Bigat kasangaldaw, asawaendanto metten. No alaen ti asawaenna, mabatiakton a maymaysa.

Manong Danny, ditoykon a gibusan daytoy pakasaritaak. Sapay koma ta sakbay a matayak, matungpal koma ti arapaapko a makita pay ni Maricar, ti asawana ken dagiti appok ken makadenna uray apagbiit ti buridekmi a ni Joy. Ammok a narigat daytoy a mapasamak ngem agtultuloy ti panagkarkararagko a pumudno koma ti arapaapko tapno makapagdedennakami amin nga annakko iti tartaraudi nga aldawko ditoy lubong.

Kastan, naimbag nga aldawmo.

 

 

Toy siraraem kenka

 

Domeng

Candon City, Ilocos Sur

 

Comments are closed.