Footer

MAREGMEG TI BALITOK: Dagiti Pagesman ti Bagi

Pakasaritaan daytoy ni Periong, taga-Pangasinan nga insalaysay ti kaduatayo iti Gumil Pangasinan. Siak idi ti presidente ti GP iti 1999-2000. Naikamangak ngamin ditoy a probinsia nupay iti San Antonio, Narvacan ti puonko ken agdamaak nga agnaed iti Baguio City.

Nupay panglawaen ti daga ni Periong iti lugarda, narigat ti panagbiagda. Gapu iti kinangato ti gagatangen aglalo iti abono ken dadduma pay a kasapulan iti talon, dakkel ti magastosna iti panagtalonna ket bassit ti matda iti apitna ken pasaray agkurang pay a para kadakuada a sangapamilia. Lima ti anakda ken ni Belen.

Sangkasapulan, sangkaapuyan a kunada.

Gapu ta saanda a makalunglung-aw iti rigat, napanunot ni Belen ti mapan idiay HongKong agtrabaho kas domestic helper. Inyutangda ti kaibatoganda a langit iti panagaplay ni Belen nga agtrabaho iti sabali a pagilian.

Napagasatan ni Belen nga agtrabaho iti babaen ti naanus ken managayat nga amo. Napigsa ti sidelinena idiay Hong Kong ket dakkel ti impawpaw-itna a kuarta ken ni Periong. Insuratna nga idulin ti asawana ti kuarta iti bangko tapno adda madadaan a gastuen dagiti annakda no tumapogdan iti kolehio.

No dadduma, adda dagiti kaso a “mabartek” ti tao a naggapu iti baba gapu iti nam-ay a sagsagrapenna ket malipatanna ti puon ken gapuna a laklak-amenna dayta a nam-ay.

Idi aggawaten ni Periong iti doliar, simmardeng nga agtalon. Nasursurona ti makibarkada. Nasursurona ti sumrek kadagiti balay-ragsak iti Urdaneta City ken Dagupan City. Gastos ditoy, gastos didiay, gastos dita.

Pinatigmaanan dagiti dadakkelna. Pinalagipan dagiti papagayamna. Ngem saanna a dinengngeg ida.

Ti makapadakes, nasursurona ti agsugal ken agbabai. Idi karigat ti panagbiagda, pulos a di pay immadak iti sugalan ken immapros iti babai.

Simmangpet ni Belen. Sinapulna dagiti kuarta nga impaw-itna. Ania ngarud ti maipakita ni Periong ta intayab met ti sugal, babai ken arak? Dina napanunot nga agpaay koma ti kuarta para iti masakbayanda a sangapamilia. Inunana ti pagesman ti bagina ngem ti akemna a kas ama.

Nakapungtot ni Belen. Innalana dagiti annakna ket nagpaknida iti balay ti dadakkelna iti kabangibang a barangay sa nagsubli idiay Hong Kong. Manipud idin, no agpaw-it iti kuarta, iti dadakkelna ti pangipatulodanna, saanen a ni Periong.

Nagbalin a nakapimpiman ni Periong. Nabati a solo nga agbibiag. Awanen ti kuartana. Kimmayakay dagiti barkadana idi awanen ti madilamotda kenkuana.

Immabut iti nasurok dua a bulan sakbay a makuna a napasubli ni Periong ti “umno a nakemna”. Nagsubli a nagtalon ken nagbangkag. Impapatinan ti nangtaripato iti dagana. Linaksidna dagiti pagesman ti bagina. Iti panagtalon ti nangituonanna ti amin a panawenna.

Nakatiamba met iti panagtalonna. Dakkel ti naapitna. Nagmula iti sandia, murod ken kamatis. Dakkel ti napastrekna. Nagpatakder iti pagtaraknanna iti baboy ken manok. Immawat pay iti ad-adu a sukayenna ket minulaanna iti mais. Immadu dagiti negosiante a mapan gumatang iti produktona. Isudan ti mangdanon kenkuana. Di pay maapit no ar-arigen dagiti mulana, pakiawendan. Bimlad ti bulsa ni Periong.

Pinarakrakna ti agrakrakaya a balayda ket pinatakderanna iti dua kadsaaran a kinabiti a pagtaengan. Iti lugarda ti balayna ti kadakkelan ken kadaegan.

Nagsubli dagiti barkadana ngem saannan nga intaltalek dagitoy. Inkarina a dinan sublian dagiti aramidna idi a puon ti nagtalawan ni baketna.

Lima a tawen ti napalabas. Naklaat laengen ni Periong iti maysa a malem a panagawidna manipud iti talon idi madatnganna ti baketna ken dagiti annakna iti balayna. Siempre, napasangit ni Periong iti napalalo a ragsakna!

Kuna ti Roma 13:12-14: “Lumabasen ti rabii ket bumigaten. Iwaksitayo dagiti aramid ti sipnget ket ikawestayo dagiti lawag: awan nalabes a panagraragsak wenno panagbarbartek; awan ti kinaderrep wenno naalas nga aramid; awan ap-apa ken im-imon. Ikawestayo ketdi ni Apo Jesucristo a kas armastayo ket isardengtayon a pagustuan ti dakes a tarigagay dagiti bagbagitayo.”

Saan a nagbiddut ni Periong iti panangtallikudna iti dakes a pagesman ti bagina. Iti dayta a panagsublina iti nalinteg a panagbiag, saan laeng a ti napukaw a pamiliana, ti napukaw a kinataona ti napasublina no di pay dagiti linas a mamagsilpo kenkuana iti Namarsua.

Ala, ngarud, babayu, kailian.#

 

Comments are closed.