Footer

SALAYSAY: Kannawidan Ylocos Festival: Burit ni Ilokano (Maikadua a paset)

SIGLAT AWARDEE. Aw-awaten ni Nueva Segovia Archbishop Emeritus Edmundo Abaya ti tropeo iti pannakabigbigna kas maysa kadagiti Fr. Jose Burgos Achievement Awardees manipud ken ni Gob. Deogracias Savellano. (Dante Tacata)

SIGLAT AWARDEE. Aw-awaten ni Nueva Segovia Archbishop Emeritus Edmundo Abaya ti tropeo iti pannakabigbigna kas maysa kadagiti Fr. Jose Burgos Achievement Awardees manipud ken ni Gob. Deogracias Savellano. (Dante Tacata)

Iti rabii, naitampok ti produkto nga abel-iloko iti maysa a fashion show. Walopulo nga abel-iloko a koleksion ni Dita-Sandico Ong, nalatak a fashion designer, ti inrampa dagiti beauty queens ken sumingsingising a ramp models manipud Manila ken dagiti 19 a kandidata ti Saniata ti Ilocos Sur. Ditoy a naipakita dagiti inobasion ken baro nga usar ti lokal a tela. Maysa met daytoy a wagas a panglukat iti kinamanagpartuat ni Ilokano tapno makita ti potensial ti produkto nga abel iti garment industry. No umadu ti agaramat iti abel, umadu met ti agsubli nga agpartuat itoy a tela ket siempre, umadu ti maaddaan iti trabaho.

Awan manen ti itiitan iti sango ti kapitolio iti maikalima nga aldaw ti Kannawidan Ylocos Festival. Naiparada iti aglawlaw ti Metro Vigan dagiti kadaanan a lugan (vintage cars) a pakairamanan ti Willy’s jeep, sports cars, limousine, bisikleta kasta metten dagiti kalesa. Saan a nalapdan dagiti tattao a nagpaala iti ladawanda iti abay dagiti luglugan.

Kalpasan ti pangaldaw, nagsibagkat dagiti umili kadagiti tarakenda a dinguen. Adda kalding nga uppat ti anakna, higante a kalding a produkto ti livestock upgrading program ti probinsia, manok nga extra large ken extra heavy, manok a baliktad ti dutdotna, manok nga uppat ti sakana ken dadduma pay a karkarna a dinguen a nangawis iti imatang dagiti tattao.

Naaramid met ti lumba ti kabalio iti UNP quadrangle iti malem. Adu nga interesado iti daytoy nga sport ti nagtitipon ditoy tapno buyaenda ti panaglulumba dagiti native a kabalio iti eskapo ken paso. Maysa daytoy kadagiti kayat ti gobernador a mataginayon a kannawidan gapu ta manmanon a maisayangkat dagiti karera ti kabalio iti probinsia.

Iti rabii, naangay ti Saniata ti Ilocos Sur pageant. Inyalat ni April Love Jordan ti Vigan City ti titulo a Saniata ti Ilocos Sur. Napili pay a Best in Long Gown, Best in Swimsuit ken Best in Casual Wear. Dagiti dadduma pay a nangabak: Corazon Roldan ti Gregorio del Pilar, Saniata ti Ilocos Sur-Tourism, Media’s Choice ken Ilocano’s Choice; Paula Camille Figuerres ti Sta. Lucia, Saniata ti Ilocos Sur-Environment ken Best in Talent; Suzanne Tabetha Mendoza ti Vigan City, first runner up; ken Micah Avon Mariano ti Vigan City, second runner up. Napili met da Leslie Sincioco ti Santa kas Miss Photogenic; ken Cristine Leah Legarda ti Narvacan, kas Miss Friendship.

Nagbalin nga Aldaw dagiti Gunglo ti Umili (NGOs) ti maikanem nga aldaw. Ditoy a naipakita dagiti nakaisigudan nga ay-ayam kas iti sungka, tug of war, palo sebo, tinniliwan ti baboy, kadangkadang, sack race ken dadduma pay. Naituloy met ti pasalip nga “Awan Innatrasan”. Ad-adu manen a kategoria ti nagsasalipan dagiti umili. Malaksid iti pasalip iti pannangan iti longganisa ken empanada, adda payen bagnet, tinubong, opia, kalamay, tupig, chichacorn, balikutsa ken bibingka eating contest.

Maysa met a symposium mainaig iti preservation and conservation ti naramid iti kabigatanna. Ditoy a naipaganetget kadagiti estudiante ti pateg ti pannakapreserba dagiti tawid a kinabaknang ti probinsia tapno makitanto pay ida dagiti sumaruno a kaputotan. Naipasagepsep iti isip dagiti nagatendar a tagipatgenda koma ti kabukbukodanda a kultura ken kannawidan ta paset dagitoy ti pakasaritaan ni Ilokano a saan a rumbeng a mapunas ken maitanem.

Karabianna, naisayangkat ti Fr. Jose Burgos Achievement Awards a nakarekognisaran dagiti taga-Ilocos Sur a nakaipaay iti dayaw iti probinsia saan laeng nga iti pagilian no di pay iti sangalubongan.

Dagitoy dagiti napadayawan: John Daniel Lemi, Christian Jan “CJ” Raquepo Suarez, Gerardo Rosario (Sports); Visitacion Javier, Bienvenido ken Milagros Rodriguez, Alejandro Rosario (business); David Pichay, Fidel Go (Arts); Cong. Mauricio Domogan, Atty. Nelly Favis Villafuerte (Public Service); William Dar, Ph.D (Agriculture); Minervina Dario-Singson (Music); Dita Sandico-Ong (Fashion Design); Dr. Antonio Lahoz (Medicine); Archbishop Emeritus Edmundo Abaya (Religion) ken Lorenzo Mata (Education).

(Maigibusto)

Comments are closed.