Footer

BANNER NEWS: MOA ti gobierno probinsial, NFA: P13 ti support price ti mais/kilo

VIGAN CITY – Nagtignay ti gobierno probinsial a mangtulong kadagiti mannalon iti sanguanan ti panagsuek ti presio ti mais babaen ti iseserrekna iti maysa a katulagan iti ahensia ti gobierno nga aggatgatang iti daytoy a produkto.

Simrek ti provincial government iti katulagan iti National Food Authority para iti panaggatang ti ahensia iti saan a nababbaba ngem iti floor price a P13 kada kilo tapno maigawid ti ad-adda pay a panagpababa ti presio daytoy a produkto.

Manipud iti P20 kada kilo idi Disiembre itay napan a tawen, nagsuek ti presio ti mais iti P11 kada kilo iti umuna a lawas daytoy a bulan.

Nagpinnirma itay Marso 12 iti maysa a memorandum of agreement ti provincial government nga imbagian ni Gov. Deogracias Victor “DV” Savellano ken ti NFA nga imbagian ni Regional Director Amadeo de Guzman para iti Corn Marketing Assistance Program for Industry Producers, Users, and Local Government Units a manamnama a mangtulong kadagiti mannalon babaen ti pannakaited kadakuada iti support price iti produktoda a mais.

Sinaksian da Vice Gov. Jerry Singson, NFA Provincial Director Fortunato Bulao, LMP-Ilocos Sur President Edgardo Zaragoza, Provincial Agriculture Officer Teofilo Quintal, Provincial Agriculture Action Council President Salvador Cadorna, dagiti bokal, mamayor ken dagiti mannalon manipud iti agduduma nga ili ti probinsia ti panagpinnirma dagiti dua nga opisial iti nasao a katulagan.

Kinuna ni Savellano a napanunotna a pabaruen ti MOA a napirmaan itay napan a tawen iti baet a nalugi ti gobierno probinsial tapno matulongan dagiti mannalon iti sanguanan ti nababa a presio ti produktoda a mais.

Dinawatna kadagiti LGUs ken barangay officials a tumulongda iti pannakamonitor iti implementasion ti nasao a katulagan tapno malapdan ti pananggundaway dagiti di mapmapnek a traders kadagiti mannalon.

Impanamnama met ni de Guzman ti suporta ti NFA kadagiti mannalon idinto a sinaludaranna ni Savellano gapu ta iti laeng Ilocos Sur ti addaan iti kastoy a programa a mangtulong kadagiti mannalon.

Indagadag met ni Cadorna ti panagtignay ti turay tapno malapdan ti importasion.

“Malakomi koma nga umuna ti produktomi sakbay a maipalubos ti panagangkat. Ditay koma liplipatan a no awan ti mannalon, agbisin ti amin uray dagiti adda igatangna,” kinuna ni Cadorna.

Impasingked met ni NFA provincial officer Bulao a dagiti laeng pudpudno nga agmulmula iti mais ti mabenepisiaran iti subsidy nga ited ti ahensia nga idauluanna.

Kabayatanna, maysa a resolusion ti pinutar ni party list representative Jose Ping-ay a mangidagadag iti Department of Agriculture iti pannakaisardeng ti importasion iti mais manipud iti ballasiw taaw iti sanguanan ti panagsuek ti presio daytoy a produkto.

Impalgak ni Ping-ay a suportado ti Northern Luzon Alliance Group a buklen dagiti Ilokano nga agilinlinteg iti Amianan a Luzon iti babaen ti panangidaulo ni Deputy Speaker Eric Singson ti resolusionna.

“Masapul nga ilabantayo iti Kongreso ti karbengan dagiti mannalon nga agmulmula iti mais,” kinuna ni Ping-ay.#

Comments are closed.