Footer

BANNER NEWS: Vigan City, National Awardee kas Most Child Friendly City

VIGAN CITY – Inyalat daytoy a siudad ti pammadayaw kas Most Child-Friendly City (Component City Category) iti intero a pagilian.

Indauluan ni Mayor Eva Marie S. Medina ti delegasion daytoy a siudad a nangawat iti pammadayaw manipud ken Pres. Gloria Macapagal-Arroyo iti seremonia a naangay iti Malakaniang itay Marso 12.

Iti interbiona iti media, kinuna ni Medina nga ibingayna ti nagun-od ti siudad a pammadayaw, saan laeng kadagiti opisial ken department heads no di pay kadagiti amin nga umili ti Vigan gapu iti panangsupsuportada kadagiti programa ti city government.

“… Daytoy ti mangipakita ti panagkikinnamayyet dagiti umili ken ti city of Vigan,” kinuna ni Medina.

Malaksid iti tropeo, immawat ti Vigan City iti P300,000 cash award.

Karaman dagiti napadayawan a Most Child-Friendly City ti Naga City (Independent City Category) ken ti Makati City (Highly Urbanized City Category).

Napadayawan met ti San Mateo, Isabela a Most Child-Friendly Municipality (1st to 3rd class Municipality Category) ken ti New Lucena, Iloilo (4th to 6th Class Municipality Category).

Maysa kadagiti napagpilian a Most Child-Friendly Municipality (4th to 6th Class Municipality Category) ti Bantay, Ilocos Sur.

Kinuna ni Medina a kadakkelan a puntos a nangabakan ti Vigan City ti naipasdek a Buridek Children’s Museum, ti Stimulation Therapeutic Activities Center, ken dadduma pay a programa a mangital-o iti pagimbagan ken kinatao dagiti ubbing ditoy siudad, ti kumpleto a dokumentasion dagitoy a proyekto, ti Management Information Service (MIS) ken iti kaaddan iti plantilla positions dagiti Day Care Workers.

Kinasalip ti Vigan City kas Most Child-Friendly City iti kategoria ti component city ti Tagum City, Tagaytay City ken ti Malaybalay City.#

Comments are closed.