Footer

Biahe ti eroplano a Manila-Vigan, Vigan-Manila, pormal a nailunsad

QUEZON CITY -Pormal nga inlunsad da Gob. Deogracias Victor Savellano ken ti Inter-Island Airlines ti biahe ti eroplano a Manila-Vigan-Manila via ti eropuerto ti Vigan City iti maysa nga otel ditoy itay Marso 9.

“Maysa daytoy a break-through para iti lalo pay a panagdur-as ti Ilocos Sur gapu ta manamnama ti isasan-tak pay ti turismo ken negosio iti probinsia,” kinuna ti gobernador bayat ti launching ti nasao a biahe ti eroplano a naangay idi Marso 9 iti Hotel Rembrandt itoy a siudad.

Kas iti immun-unan a panangipakaammona iti probinsia, dinawat manen ni Savellano ti naan-anay a pannuporta dagiti amin a sektor tapno agballigi ti proyekto.

Kabayatanna, kinuna ni League of Municipalities of the Philippines, Ilocos Sur Chapter President Edgardo Zaragoza a dakkel a tiempo ti mainut iti kaaddan ti biahe ti eroplano gapuna nga ikampaniana a suportaran dagiti umili nangruna dagiti negosiante daytoy.

“Ti maikarik ken ni Gov. DV ket ti naimpapusuan a panangikampaniak itoy a proyekto iti man grupomi a mamayor wenno kadagiti kalugaranmi ta mamatiak a kasapulan ti probinsia ti kompleto a pasilidad tapno naan-anay ti panagdur-asna,” innayon ti mayor.

Iti tourism summit a naangay iti Ilocos Sur, nadakamat ti gobernador a nangilatang ti probinsia iti P1.6 million para iti 30 guaranteed seats nga alaen ti probinsia tapno maguyugoyna ti Inter Island Airlines a manglukat iti rota a Manila-Vigan ken Vigan-Manila.

Bayat ti nasao a summit, impakaammo ni Luc Helgen, chairman ti Inter-Island Airlines a mangrugi ti umuna a biahe iti Marso 19.

Segun ken ni Department of Tourism regional director Martin Valera, kangrunaan a benepisio ti kaaddan ti biahe ti eroplano a Manila-Vigan ti kalakan ti access ken maksayan pay ti fuel cost dagiti agbibiahe nga agar-aramat iti luganda.

“Kadagiti kanayon nga agkamkamat iti oras, sigurado a maragsakanda iti kaaddan ti Manila-Vigan vice versa a biahe,” kinuna ni Valera.

Sinaludaran met ni Quezon City 1st District Representative Vincent “Bingbong” Crisologo daytoy nga addang ti gobierno probinsial idinto a kinunana a dakkel a pakalag-ananda a Manila-based Ilocos Surians ti kaaddan ti biahe ti eroplano ditoy.

Inkari ti diputado nga awisenna dagiti kadistrituanna nga umay met mangkita iti pintas ti Ilocos Sur.

Iti inisial a rota, agbiahe ti Inter-Island Airlines manipud Manila iti alas kuatro ti malem ti Domingo ket agsubli iti 7:30 ti bigat ti Lunes. Tumayab met ti maikadua a biahe iti 4pm ti Huebes ket agsubli iti Manila iti 7:30 ti bigat ti Biernes.

Segun ken ni Helgen, P3,450 ti plete ti one way a biahe wenno P6,900 ti roundtrip.#

3 Responses to Biahe ti eroplano a Manila-Vigan, Vigan-Manila, pormal a nailunsad

  1. Dolores Garcia March 27, 2009 at 3:53 am #

    Very good idea, we really need it. Because taking the bus or driving is very tiring. Thank you so much! Is there a number to call to make a reservation? Or just walk at the domestic airport in Mla. and vice versa? Where is the airport in Vigan located?

  2. Guest March 27, 2009 at 4:02 am #

    Here is the website of InterIsland Airlines with contact numbers:

    http://www.interislandairlines.com/flights.htm

    The airport is in Mindoro:

    http://en.wikipedia.org/wiki/Mindoro_Airport

  3. Dolores Garcia March 27, 2009 at 5:23 am #

    Thank you so much
    Jasper for the info!