Footer

EDITORIAL: Gakat a Right to Reply, saanen a kasapulan

MAYSA a gakat a napinget ita a konkontraen dagiti media organizations ditoy pagilian ti Right of Reply bill a pinutar ni Sen. Aquilino Pimentel, Jr.

Sagudayen daytoy a gakat nga ipatangatang wenno ipablaak dagiti media firms ti sungbat ti maysa nga indibidual kadagiti estoria wenno komentario nga iti pammanunotanna ket bangking, saan a pudno ken saan a maikanatad para kenkuana.

No patien ni Pimentel, nairanta ti gakat a “mangsalaknib kadagiti tattao kadagiti palso wenno saan a pudno nga artikulo iti media a mangilugar kadakuada iti dakes a lawag wenno mangpadakes kadakuada, nairanta man wenno saan.”

Segun pay iti senador a babaen ti nasao a gakat, maikkan ti indibidual iti gundaway a mangsungbat kadagiti kritisismo wenno komentario maikontra kadakuada iti pumadpad nga oras wenno espasio a naaramat idi naipatangatang wenno naipablaak dagitoy.

Nakarkaro pay ti bersion ti Kamara iti daytoy a gakat ta adda pay naiproponer a pannusa kadagiti publisher wenno editor-in-chief ti publikasion, wenno iti akinkukua wenno station manager iti maysa a broadcast station no saanda nga ikkan iti patas a pannakatratar ti nakritikar wenno nababalaw nga indibidual.

Mabalin nga iti panirigan ni Pimentel, pagsayaatan ti media ti Right to Reply bill. Ta no kano maikkan ti nakritikar a tao iti gundaway a mangsungbat iti pammabalaw kenkuana, malapdan ti posible a pannakaatake dagiti kameng ti media, iti man warnakan wenno iti broadcast. Kuna ni Pimentel a mabalin a maiduron nga agaramid ti maysa a tao iti kinadamsak no iti kapanunotanna, saan a maikkan iti patas a pannakatratar ti media iti pumadpad nga oras a pannakaipatangatangna wenno espasiona iti warnakan.

Raemenmi ni Sen. Pimentel. Masirib nga abogado. Idi tiempo ti Martial Law, isu ti maysa kadagiti salaknib dagiti biktima a nalabsing ti kalinteganda a kas tao ken iti kinawaya ti prensa.

Ngem makunami a saanen a kasapulan daytoy a gakatna agsipud ta maysa a basic right ti kalintegan a sumungbat ket polisia wenno pagrebbengan ti aniaman a pagiwarnak wenno broadcast ken TV firms nga ited ti pumadpad a gundaway iti maysa a tao a mangsungbat wenno manglibak iti kritisismo wenno pammabalaw a naibato kenkuana.

Uray awan daytoy a gakat, pagrebbengan dagiti warnakan ken broadcast stations ken telebision nga alaen ti biang ti indibidual tapno sungbatanna dagiti kritisismo wenno pammabalaw maikontra kenkuana.

Iti panagkitami, napeggad ketdi daytoy a gakat para kadagiti kameng ti media a pakaibilangan daytoy a pagiwarnak, agsipud ta ikkaten daytoy ti kinawaya ti prensa a mangbabalaw wenno mangkritikar kadagiti tattao, nangruna kadagiti politiko ken nangato nga agtuturay nga agliway, aglabsing wenno agabuso iti pagrebbenganda.

Saan a maikkat ti suspetsami a naputar daytoy a gakat tapno laeng maikkan dagiti politiko iti libre nga espasio ken oras iti pagiwarnak wenno radio stations ken telebision ken tapno makontrolda ti opinion ti publiko.#