Footer

KOMENTARIO: Adda kadi pay nabatbati a konsensiatayo? (Maudi a paset)

ADDA PAY dagiti agtuturay a mangingato kadagiti gatangenda para iti opisinada. Overpricing nga agdadata ngem bay-am dita, nalabit kunada. Mabalin nga adda kumplotda ken napigsa ti kapetda ta dida agbuteng nga agaramid iti dakes.

Pagarigan met dagiti binutosantayo a mangibagi kadatayo iti Kongreso. Mano kadakuada ti agtugtugaw lattan iti tugawda, agdengdengngeg lattan iti no ania nga issue a maidatag iti Kongreso. Para butbot iti tugaw dagitoy. Isuda dagiti chairman iti committee on silence a kunada. No palausen ti manarita, dida koma maikari a mangala iti sueldoda, honorarium, CDF, CIA ken no ditan a pagimbagan. Kasano koma a maibagada a maikarida nga umawat iti kasta kadakkel a pirak ket awan met ti ar-aramidenda iti Kongreso no di agtuglep wenno agpadakkel iti bat-og? Kaasi pay ni Angkuan!

Pagarigan met dagiti pannakabagi ti linteg (puera de los buenos), adun dagiti mabasbasatayo nga isuda gayam ti agar-aramid iti dakes kas iti panaghold-ap, panagtakaw, panagrames, protektor iti hueteng, dado, ken dadduma a sugal ken no ania ditan a pakaleksaban iti pirak.

Imbes nga isuda ti mangsaluad iti urnos ken talna ken mangkita iti pagimbagan dagiti umili, saan, isuda ketdi ti mangriribuk ken mangmangted iti aliaw ken buteng.

Sabali met dagiti makitkitatayo a saan a maiparbeng a pakaigastuan dagiti pondo ti gobierno. Kas koma dagiti kalsada. Adda pay dagiti kalsada a kasemsemento no ar-arigen, agrikkidan. Apay a kasta? Ania ngarud ta dakdakkel met ti naleksab ngem ti pagpatarimaan wenno pagpalawa kadagiti kalsada!

Paglibakan la ketdi dagiti agtuturay ngem ammo dagiti umili a sakbay a maited iti maysa a kontraktor ti proyekto, maikkaten ti para ken ni politiko wenno agturay. No wais ti kontraktor, ipa-subkontrakna ti proyekto ket mangilgat metten iti para kenkuana. Kasta met ti sumaruno, ipa-subkontrakna ti proyekto ket adda metten ganansiana.

Diay kaudian a mangkontrata ti kakaasi. Ania ngarud, aramidenna amin a panaginut, manipud semento, bato, darat, sueldo ken uray kabassitan a lansa tapno adda met maleksabna.

Pagtungpalanna, awan pay makatawen, kasla pagsungkaanen ti kalsada wenno mabalin a pagparaepanen!

Kas iti lahar dike iti Tengnga a Luzon. Adda pay dagiti dike a kaipatpatakder, bassit laeng a tudo, imbuangen ti lahar. Maymaysa ti kayatna a sawen daytoy. Narukop dagiti naipatakder a dike. Apay? Basbassit nga adayo dagiti naikapet a landok ken battit-utit ti sementona. Apay a nagbanag a kasta? Kasano ngamin ket nagdakkelan met ti naikkat iti pondo. Napananna? Uray saantan nga ibuksilan, ammon no akinbulsa ti napananna.

Adda pay dagiti agpatakder kadagiti barangay hall, barangay stage wenno basketball court. Apay, kasapulan kadi unay dagitoy? Mano kadi ti maserbianda nga umili?

Apay a saan koma a maigasto dagiti pondo kadagiti irigasion tapno adda pagtarayan ti danum a pagsibog kadagiti mula? Wenno pannakaaramid kadagiti kalsada tapno adda pangibiahean ni komersiante wenno mannalon kadagiti produktoda? Wenno pannakaipasdek dagiti livelihood projects kas iti panagtaraken iti manok, baboy, kalding ken dadduma pay a dingnguen?

Sumagmamano laeng dagitoy dagiti mapalpaliiw toy numo ti biang a di koma rumbeng a mapasamak. Ket masaludsodko: pagturongan ti biagtayo? No kastoy latta ti panaguyas ti panagbiagtayo, kasano a rumang-ay ti pagiliantayo?#