Footer

Konseho, agimbestiga mainaig gasoline slips

CABUGAO, Ilocos Sur – Mangisayangkat ti sangguniang bayan ditoy iti panagpalutpot mainaig kadagiti gasoline slips a baybayadan ti gobierno munisipal ditoy.

Natinong daytoy ti sangguniang bayan iti sanguanan dagiti alegasion a maab-abuso ti pannakaaramat iti gasoline slips para kadagiti lugan ti municipal government ditoy.

Aganay a P418,000 ti kadagupan dagiti gasoline expenses a bayadan ti gobierno munisipal ditoy manipud idi Nobiembre agingga iti Disiembre idi napan a tawen.

Naipalaon ti pagbayad iti nasao nga utang iti supplemental budget daytoy nga ili nga agdagup iti P4 milion.

Kanaig daytoy, pinaayaban ti sangguniang bayan ti General Services officer tapno lawlawaganna no ania a lugan ken opisina ti nakaaramatan dagiti gas slips.

Iti listaan nga indatag ni GS Officer Dito dela Cruz iti sangguniang bayan manipud Enero 10 agingga iti agdama a bulan, limtuad a dua a kaap-apeliedo ti mayor ti mapapati a nagaramat iti gas slips nga umabot iti P28,000, awanan iti control number dagitoy ken awan ti nailanad nga opisina wenno ania a lugan ti nakaaramatanna.

Ngem kinuna ti GS officer a nabayagen a saan a nagpirma kadagiti gas slips ken dina am-ammo dagiti nadakamat a tattao a nagaramat iti makueskuestionaran a gas slips.

Kinuna ni dela Cruz nga indanonnan daytoy a banag iti mayor.

Napagtinongan dagiti konsehal a committe of the whole ti mangisayangkat iti panagimbestiga ken maiwayat bayat ti pannakaangay ti regular a session.

Naituding a paayaban ti Konseho ti maysa a pannakabagi dagiti tallo a gasolinaan ditoy tapno mangtedda iti pakalawlawagan mainaig dagiti gas slips a maisaksakada kadakuada.#