Footer

SARITA: Nadaraan a linnaaw (Maikadua a paset)

Saan a nakasungbat a dagus ni Padre Cristobal. Naapirasna ti timidna. Nadagsen daytoy a problema dagiti taga-Begnas.

“Idi immay ni Mayol Aguimbag, kinunana a maysa pay la a plano ti gobielno plobinsial ti pannakapenned ti Kalayan Ambatan. Dimi ninamnama nga ipatakdeldan a dagus ti langtay,” kinuna ni Ama Dalmeg.

“Panagkunam, adda pannakaammo ni Mayor Aguimbag iti pannakaitrabaho a dagus ti penned?” kinuna ni Padre Cristobal.

“Idi minitingnakami, maliknak a pabol iti pannakapenned ti Kalayan Ambatan. Dina intaltalek ti isusupiatmi ta maysa met a mapalabulan.”

Saan a nagtimek ni Padre Cristobal. Pudno ti kuna ni Ama Dalmeg. No mapenned ti Karayan Ambatan, addanton pangawidan iti danum a mangpasayak kadagiti nalawa a daga ni Mayor Aguimbag iti Barangay Matipukpok.

“Padasentayo latta a kasarita ni Mayor Aguimbag. Saan a rumbeng a rimbawan ti interesna ti pagimbagan dagiti pumurok a kas kadakayo,” nakuna ni Padre Cristobal.

“Wen, umabuloyak iti kunam, Padle,” kinuna ni Ama Dalmeg. “Kayatko a malisut daytoy a ploblema babaen ti nainkappiaan a wagas.”

Pinukkawan ni Padre Cristobal ni Ama Basiong ket imbagana a rummuar biit. Sineniasan met ni Ama Dalmeg dagiti lima a kakaduana nga agtutugaw iti sirok ti narukbos a mangga.

Nauneg ti pampanunoten ni Padre Cristobal bayat ti panangpanurnorda iti kalsada. Naiparparipiripen idi ni Mayor Aguimbag ti panggep ti gobierno probinsial a mangpenned iti Karayan Ambatan. Ngem saanna nga inikkan iti naan-anay nga atension daytoy ta ti panangipagarupna, maysa laeng daytoy kadagiti proyekto ti probinsia nga agpatingga laeng iti plano. Malaksid iti kadakkel ti gatad a kasapulan, manamnama pay ti saan nga ikakanunong dagiti lumugar a masalapon ti proyekto. Iti pakpakauna a surbey nga insayangkat ti gobierno probinsial kadagiti agindeg a masakaw iti proyekto, limtuad a saanda a pabor iti nasao a plano.

Manipud idi, awanen ti nadakdakamat ni Mayor Aguimbag mainaig iti daytoy a proyekto. Uray isu, dina ninamnama ti panangipatungpal ti gobierno probinsial iti planona a pannakapenned ti Karayan Ambatan. Iti pannakaammona, inibbatanen ti gobierno probinsial dayta a proyektona gapu iti isusupiat dagiti lumugar iti Begnas ken kabangibangna a lugar. Ngem inur-urayda laeng gayam ti panagkalma ti aglawlaw sada kellaat a nagkuti.

Iti pannarita ni Ama Dalmeg, nagsasaruno ti dua a trak a nagluganan dagiti trabahador ken lima a bagon a nagkarga iti semento, darat, bato ken landok a limmasat iti purok bayat ti kaaddada iti umada.

Sakbay ti panagtangep dagiti bulong dagiti kayo, nakaipatakderen dagiti trabahador iti pagturogan ken pangananda iti arsadanan ti bantay.

“Idi pinadasmi ti umasideg, linapdannakami dagiti gualdia nga adda almasda, padle!” kinuna ni Ama Dalmeg.

Masungaddan ti pagtaengan ni Mayor Aguimbag. Ti balayna ti kapintasan ken kamodernoan iti sibubukel a Legleg. Addaan pay iti swimming pool ken nalawa a hardin.

Intalmeg ni Padre Cristobal ti buton ti buzzer a naimuntar iti pannakaadigi ti natayag a ridaw a landok.

Nailukat ti maysa a paset ti ridaw ket nagparang ti rupa ti maysa a nabaneg a lalaki. Ni P01 Nestor Lang-as, kaanakan ti mayor nga agserserbi metten a badigardna.

“Ania ti masapulyo, Padre?” sinaludsod ni P01 Lang-as.

“Adda gagarami ken ni Padre Aguimbag. Mabalin nga ibagam nga addakami ken ni Ama Dalmeg ken dagiti kapurokanna iti Begnas?”

“Aguraykayo ngarud ta ipakaammok ken ni Mayor ti kaaddayo,” kinuna ti polis sana met la inserra ti ridaw.

Madamdama, nagsubli ti polis.

“Di la mabalin nga agsublikayonto kanon iti sabali nga aldaw, Padre, ket agid-idda pay ni Mayor. Kasangsangpetna ngamin manipud iti Manila,” kinuna ti polis.

“Kasta? Baliwanminto ngarud ti umay,” nakuna ni Padre Cristobal. Nakarikna iti pannakaupay iti daytoy nga inaramid ti mayor. Uray kasano a puyatna, dina la kadin maikkan ida iti sangkabassit a kanito? Iti panagriknana, liklikan ti mayor ti panagsasangoda. Ammona la ketdin ti gagarada itay nadakamatna a kaduana ni Ama Dalmeg.

Awan arimekmekda a nangtarengteng iti kalsada.

“Ammok no apay a dinatayo sinango ni Mayol Aguimbag, Padle,” binurak ni Ama Dalmeg ti ulimek. “Lutingkami laeng a makugkugtalan iti dalan!

“Mabalin a pudno a napuyatan ni Mayor Aguimbag,” kinuna ni Padre Cristobal. “Agsubliakto inton pangaldaw. Kayatko nga ammuen ti pagtaktakderanna mainaig iti pannakapenned ti Karayan Ambatan.”

“Ni Palwew ti danagek. Saan a makalawlaw iti kelleb ni Palwew. Amkek ti alamidenna no agtuloy latta ti pannakapenned ti Kalayan Ambatan.”

“Bagaam ni Palwew a saan nga agdardarasudos. Risutentayo daytoy iti nakappia a wagas!” kinuna ni Padre Cristobal.

(Maituloyto)