Footer

Umuna a distrito ti probinsia, nagbrown-out iti 15 nga oras

BANTAY, Ilocos Sur – Kas naipaspasakbay idi napan a bulan, awan manen ti koriente iti sibubukel nga umuna a distrito ti probinsia iti sangapulo ket lima nga oras itay Marso 14.

Nagpukaw ti koriente iti intero a first district manipud iti alas 5 ti bigat agingga iti alas 8 ti rabii itay Sabado maituloy ti panakasimpa ti nasao a substation a masarakan ditoy nga ili.

Ti substation ditoy ti pagtaudan ti suplay ti koriente para iti intero nga umuna a distrito ti probinsia.

Iti impatulod ti NGCP a waragawag kadagiti radio stations, naiwayat ti 15-oras a panagawan ti koriente tapno dalusanda ti transformer oil, agsukatda iti correctors ken dadduma pay iti nasao a substation.

Daytoy ti maikadua a gundaway nga agpukaw ti koriente iti intero nga umuna a distrito iti nasursurok ngem agmalem.

Idi Pebrero 7, nagawan ti koriente iti 17 nga oras tapno agtarimaan dagiti inhiniero ti NGCP iti nasao a substation.

Sakbayna, iti immuna a waragawagna, kinuna ti NGCP nga awan ti koriente iti intero nga umuna a distrito manipud Enero 31 agingga iti Pebrero 3 tapno matarimaan ti natakuatanda a dadael ti nasao a substation.

Kas panangipalawag ni Benigno Ramos, department manager ti NGCP, adda naduktalanda a loose connection a mangpapudot iti uneg ti nasao a substation a mangparnuay kadagiti gases a mangdadael iti insulation ken panagleak iti lana a no saan a matarimaan, posible a pakaigapuan iti dakdakkel a damag ken mabaybayag a pannakatarimaanna.

“Posible pay a bumtak ti substation,” imballaag ni Ramos.

Ngem naikabassit ti oras a panagtarimaan dagiti inhiniero gapu iti panangiyebkas ni Diputado Ronald Singson iti isusupiatna iti uppat nga aldaw a kaawan ti koriente agsipud ta kinunana a maapektaran unay dagiti negosiante ken dagiti households.

Kinuna pay ni Singson a kasapulanen a maaddaan iti back-up transformer ti nasao a substation tapno saan a mapasaran dagiti agindeg iti umuna a distrito ti mabayag a power interruption no agdadael daytoy.

Kinuna ti mangibagi iti umuna a distrito ti probinsia a lakayen ti transformer ti substation a mangsuplay iti intero nga umuna a distrito ti probinsia ket kasapulanen nga addan madadaan nga isukat no agdadael.

Kinuna ni Ramos nga idi pay la napan a tawen a nagkiddawda iti back-up transformer iti opisinada iti Manila ngem awan pay ti aksion dagiti nangangato a turayenda.#