Footer

5 komunista a rebelde, simmuko iti turay

BANGUED, Abra – Lima a komunista a gerilia ti simmuko kadagiti pannakabagi ti linteg itay nabiit ditoy iti sanguanan ti naing-inget a kampania ti baro a provincial director a mangallukoy kadagiti kabusor ti turay nga agsubli iti ikub ti gobierno.

Nainaganan dagiti simmuko a rebelde a gerilia a da Bastian Luting, 27; Froilan Lingbaoan, 24; Sammy Ortega, 26; Jimmy Garcia, 27; ken Benjo Lingbaoan, alias Ka Roy.

Segun ken ni Abra Provincial Director Police Senior Superintendent Charlo Collado, simmuko dagiti lima a rebelde a gerilia babaen ti initiatibo ni Abra Vice Governor Victorino Barona ken ni Lacub Vice Mayor Lysander Barona.

Kinuna ni katugtugaw a Cordillera Police Director Chief Superintendent Orlando Pestaño a ni Luting ti nangidaulo iti vice squad iti grupo a Marao, ti pakirupak a unit ti NPA idi 2003 ken karaman kadagiti nakiruprupak kadagiti soldado ti gobierno iti Mountain Province sakbay a nagsubli iti Abra idi 2006 tapno idauluanna kas 1st Deputy ti Kilusang Larangang Gerilya South Central iti Budabosa.

Kinuna ni Pestaño a ni Lingbaoan, alias Ka Region, ti nangidaulo kadagiti panagtambang a nakagudasan dagiti polis ken tropa ti Philippine Army.

Ni Ortega, alias Ka Warren, ti squad leader ti Yunit Gawaing Masa of KLG South Central idi 2006 ken mapapati a nangidaulo iti pannakaraut ti police detachment iti Gangal, Sallapadan idi 2008.

Simmuko met ni Benjo Lingbaoan, alias Ka Roy, ken ni Pestaño idi Marso 8 daytoy a tawen.

Taga-Lacub amin dagiti simmuko.

Idi kanikatlo a bulan, simmuko dagiti agkasinsin a Joel Billedo Zapata, 32, ken Hermes Medlang Zapata, 29, ken ni Tineg Mayor Edwin Crisologo ket insukoda dagiti armasda.

Itay nabiit, imbilin ni Defense Secretary Gilberto Teodoro iti Armed Forces of the Philippines ti panangsiputda kadagiti kameng ti grupo a bumusbusor iti gobierno kadagiti lugar a nabaknang iti mineral agsipud ta dagitoy ti pagtataudan ti pondoda para iti operasionda.#

Comments are closed.