Footer

Biomass power plant, manamnama a pagtaudan nalaklaka a koriente

VIGAN CITY – Adda posibilidad a lumakanto ti elektrisidad a bayadan dagiti residente ditoy no matuloy ti gannuat a maipatakder ti maysa a biomass power plant ditoy siudad.

Inaprobaran ti sangguniang panlungsod ditoy ti maysa a resolusion a mangited iti autoridad ken ni Mayor Eva Marie S. Medina a sumrek iti memorandum of agreement iti Pacific Ecology and Environment Inc. para iti pannakaisayangkat ti maysa a feasibility study no operational ken natalged ken adda umdas a suplay ti koriente no maipasdek ti maysa a biomass power plant kas alternatibo a pagtaudan ti elektrisidad ditoy siudad.

Maipalaon iti MOA nga awan ti magastos ti city government iti pannakaisayangkat iti feasibility study iti nasao a planta a maipasdek iti babaen ti iskema a build-operate-transfer.

Kinuna ni Mayor Eva Marie S. Medina a kasapulan nga acceptable ti MOA iti biang ti city government ken iti Pacific Ecology and Environment Inc. ken maipalaon nga adda timetable ti pannakabangon ti nasao a planta ken allowable ti klase ti fuel nga aramaten daytoy.

“Dakkel a banag daytoy iti city government ta maipalakana (planta) ti koriente agsipud ta saanton a maymaysa no di duanton ti provider a pagpilian dagiti kalugarantayo,” kinuna ni Medina.

Sakbayna, nangbuangay ni Medina iti task force nga indauluan ni Vice Mayor Franz Ranches ken nagkamengan da Konsehal Audie Agdamag, City Planning and Development Office Victor Fieldad, City Environment Officer Glen Concepcion a makinegosiar iti Pacific Ecology and Environment Inc. para iti pannakaisayangkat iti maysa a panangadal no feasible ti gannuat a maipasdek ti maysa a biomass power plant iti siudad.

Kinuna ni Vice Mayor Franz Ranches a no makita iti feasibility study nga operational ti biomass power plant, sabalinto manen a katulagan ti serken ti city government ken ti Pacific Ecology and Environment Inc. santo maipatakder daytoy iti babaen ti build-operate-transfer scheme.

Kinuna ni Ranches a malaksid nga environment-friendly ti nasao a planta, agusar pay iti agricultural waste a maikonbert nga elektrisidad.

“… Nalaklakanto ti koriente a bayadan dagiti agnaed iti Vigan City,” kinuna ni Ranches.

Comments are closed.