Footer

EDITORIAL: Dagiti mapukpukaw nga industria iti Ilocos Sur

Adu dagiti industria ditoy probinsia a pagtataudan iti pamastrekan dagiti residente. Ngem iti panaglasat ti panawen, manmanon dagiti nabatbati ket posible nga alun-onento metten ida ti moderno a panagbiag.

Kas ti panagpartuat iti sinelas iti Capangpangan, Vigan City. Ubingkami pay idi kapigsa ti panagpartuat iti sinelas iti Capangpangan. Maaramid dagiti sinelas manipud iti lalat ti animal, kas iti baka ken nuang.

Narikut ti proseso ti panagaramid iti sinelas. Makuskosan dagiti dutdot ken kimpet a taba kadagiti kudil, mayuper dagiti lalat iti pagkurtian (kasla sinublan a pakaikargaan iti apog), ken naata a kudil ti kamantiris tapno bumlad santo ibilag. Adu a puyat, kettang ken ling-et ti agsayasay iti pannakaaramid ti maysa a sinelas. Ngem saan a paudi ti pintas ti disenio dagiti sinelas ti Capangpangan ken no palausen ti manarita, makipinnaut iti dapan.

Ngem iti idadateng dagiti ismagel a sinelas, in-inut a nagpukaw daytoy nga industria. Ania ngarud ta nalaklaka met nga amang ti presio dagitoy a sinelas malaksid a nalag-an ken komportable iti saka. Iti ipupusay dagiti lumallakay nga agar-aramid iti lalat a sinelas, awanen ti simmukat kadakuada. Kaykayat metten dagiti agtutubo ti mapan makigasanggasat iti siudad nga agsapul iti sabali a panggedan. Kaadduanna pay ketdin ti napan iti ballasiw-taaw tapno agbalin a trabahador kadagiti paktoria, karpintero, mason ken dadduma pay a trabaho a mangted iti dakdakkel a sueldo ken naranraniag a masakbayan.

Ita, awanen ti agkurkuti iti Capangpangan. Natayen daytoy nga industria.

Adda pay dagiti dadduma a mapukpukawen nga industria. Dakamatentayo ti panagaramid iti kattukong. Manmanon ti agar-aramid iti daytoy. No saan a maikkan iti suporta, agngangabit a mapukaw metten daytoy nga industria.

Sabali laeng ti panagaramid iti buneng, kutsilio, kumpay ken dadduma pay a patadem. Manmanon dagiti agar-aramid iti buneng iti Santa. Dakkel ti posibilidad a no awanton dagiti agar-aramid ita ta lumakaydan, agpukaw metten daytoy nga industria.

Itay nabiit, pinadayawan ti gobierno probinsial dagiti agparpartuat dagiti lokal a produkto a dandanin agpukaw ditoy probinsia.

Napintas daytoy nga addang ti gobierno probinsial. Ngem saan laeng koma nga agpatingga ditan. Kasapulan dagitoy nga industria ti suporta ken tulong pinansial tapno makapagtultuloyda iti sanguanan ti kumpetision nga itden dagiti umarngi a moderno a produkto. Tumulong koma ti gobierno probinsial tapno agtultuloyda a tumakder nga industria.

Saan a pammadayaw ken pammigbig laeng ti kasapulan a maited kadagitoy nga industria, no di pay pinansial a tulong ken suporta. Dekorasion laeng iti diding ti pammadayaw a palagip iti nagbalin a pasetna iti napalabas. An-annuem dagiti pammadayaw no maungkawdanton dagitoy nga industria?#

Comments are closed.