Footer

Produksion ti tabako iti 2nd district, ngimmato

CANDON CITY – Ngimmato ti produksion ti tabako iti daytoy a tawen iti maikadua a distrito ti probinsia gapu ta immadu dagiti mannalon a nagmula, segun iti National Tobacco Administration.

TABAKO TI BIAGDA. Inkakaubingan dagitoy a babbaket (ngato) ti aglako iti tabako tunggal aldaw ti tienda iti ili a Cabugao. Daytoyen ti pagsapulanda iti nasurok 40 a tawen. Babaen ti panaglakoda iti tabako, napagadalda dagiti annakda ken uray pay dagiti appokoda. (Mancielito S. Tacadena/Dante Tacata)

TABAKO TI BIAGDA. Inkakaubingan dagitoy a babbaket (ngato) ti aglako iti tabako tunggal aldaw ti tienda iti ili a Cabugao. Daytoyen ti pagsapulanda iti nasurok 40 a tawen. Babaen ti panaglakoda iti tabako, napagadalda dagiti annakda ken uray pay dagiti appokoda. (Mancielito S. Tacadena/Dante Tacata)

Kinuna ni Estrella G. de Peralta, NTA OIC Branch Manager ditoy siudad, a nasurok a 600 nga ektaria ti ngimmatuan ti namulaan iti tabako iti daytoy a tawen maikumpara idi napalabas a tawen.

Kinuna ni de Peralta nga idi napan a tawen, aganay 6,982 nga ektaria ti namulaan iti tabako iti 21 a munisipalidad ken maysa a siudad iti maikadua a distrito ti Ilocos Sur, ngem iti pay laeng bulan ti Pebrero iti daytoy a tawen, immaboten iti 7,626 nga ektaria ti namulaan iti tabako, wenno nangatngato iti 644 nga ektaria.

“Kinapudnona, adu pay ti nagikamakam a nagmula iti tabako gapu ta nasayaat a presio ita, ” kinuna ni de Peralta idinto nga impalgakna nga immadu ti bilang dagiti mannalon a nagmula ita a tawen.

Segun ken ni de Peralta, agdagup iti 8,963 a mannalon ti nagmula ita a tawen, ad-adu iti 377 iti 8,586 a nagmula idi 2008 ket manamnama a maartapan ti nasurok 12 milion a kilo a produksion idi 2008.

Aganay a 45 porsiento ti produksion a tabako ti aggapgapu iti maikadua a distrito ti probinsia.

Kinuna ni de Peralta a kadakkelan ti produksion ti Candon City ket limmawa iti 223 nga ektaria ti namulaan dditoy iti tabako. Simmaruno a kadakkelan ti Narvacan, sa ti Galimuyod, Burgos ken Santa Lucia. Nupay kasta, bimmassit iti 61 ektaria ti namulaan iti Tagudin a sinaruno ti Cervantes ken Alilem.

Impakaammo ti NTA official a nasayaat ti presio ti tabako iti daytoy a tawen ket umab-abot iti manipud P70-80 gapu ta simmayaat ti kalidad dagiti naluto a bulong.

Kadagiti napalabas a tawen, dandani narpuog ti industria ti tabako gapu iti nababa a kalidad dagiti bulong a pinataud ti naapgad a daga, nasapa a panagtutudona ken nababa a presio.

Ngem naipangato iti P10 ti floor price ti tabako iti tripartite agreement iti nagbabaetan dagiti mannalon, traders ken manufacturers babaen ti panangilungalong da Gov. Deogracias Victor Savellano ken Congressman Eric Singson.#