Footer

SALAYSAY: Kararag ti kasamayan nga agas

Wen, kabsat, nasamay ti kararag. Ti napudno a panagkararag iti Apo a Namarsua ti kasamayan a mangpunas iti aniaman a problema iti biag, agraman sakit ti bagi.

Kas daytoy estoria ni Mang Ando, maysa nga atleta. Maysa daytoy a sarita ti maysa a mannurat nga insalipna iti short story contest. Ngem impettengna a saan a nagtaud iti imahinasionna no di pudno a napasamak.

Iti edadna a duapulo ket lima, ladawan koma ti maysa a nasalun-at a tao ni Mang Ando. Idi adda pay la iti sekundaria, isu ti kalaingan nga atleta iti pagadalanda. No palausen ti manarita, kabaelanna a kamaten a tiliwen ti bulos a kabalio.

Gapu iti kinalaingna a tumaray, nakisalsalip kadagiti paay-ayam. Nakagun-od iti medalia a balitok kadagiti nakisalipanna iti tinnarayan.

Napili a maysa kadagiti sanayen ti gobierno para iti internasional a paay-ayam.

Awan ti problema dagiti trainers ken ni Mang Ando. Disiplinado. No ania ti iballakad dagiti trainers, tungpalenna. Ni Mang Ando ti ladawan ti maysa a pagwadan nga atleta.

Ngem maysa nga aldaw, bayat ti panagsanayna, kellaat lattan a nadalupo ni Mang Ando. Intarayda iti ospital. Ineksamen dagiti doktor. Naduktalan nga adda sakitna a kanser iti utek. Nakaro kano unayen ket pagduaduaan no malasatna ti makatawen.

Adu ti nasdaaw no kasano a nagkanser ni Mang Ando iti utek. Awan ti bisiona. Saan nga agsigarilio ken di pay sumimsim iti arak.

Nasakit ti nakem dagiti trainers a namalubos ken ni Mang Ando ngem awan ti nabalinanda. Iti pannakatakuat dagiti doktor a nakednganen ti panagbiagna ditoy rabaw ti daga, napukawda ti maysa nga atleta nga adda pangnamnamaan a makaited koma iti pammadayaw iti pagilian. Kayarigan ni Mang Ando ti maysa a balitok a mangrugidan a mapasileng tapno naan-anay a maparuarda ti kinapategna ngem iti apagdarikmat, kas iti layap a napalusposanda.

Naggawid ni Mang Ando iti lugarda tapno ditoy ti pangpalabsanna iti maudi a tawenna iti biag. Ngem imbes nga agpulkok, saan nga intulok ni Mang Ando nga idalit ti sakitna. Agpayso, adda dagiti tiempo nga agalenna ti kasla pannakapisi ti ulona iti napalalo a sakit ngem inibturanna. Kinunana iti bagina a saan a daytoy a sakit ti mangparukma kenkuana. Kenkuana, parukmaenna daytoy a sakit babaen ti bukodna a bileg ken babaen ti pammatina iti Namarsua.

Idi atleta pay, saan unay a mannakimisa ni Mang Ando. Ngem iti kaaddan ti sakitna, nasurotan dagiti dapanna ti dalan nga agturong iti simbaan. Tunggal malem, adda iti simbaan a nakaparintumeng, agkarkararag iti Namarsua a maikkan iti pigsa ken bileg a mangparukma iti sakit nga agpanggep a mangibual iti kinataona.

“Mamatiak, Diosko, a sika ti kabilgan a Mangngagas iti sangalubongan. Mamatiak a sika laeng ti makaagas kaniak.,” inkararagna a sipapasnek.

Idi, saan unay a tumultulong ni Mang Ando kadagiti gannuat ti simbaan, ngem dakkel ti nagbaliwanna iti daytoy kaaddan iti sakitna. Nagbalin a maysa kadagiti dadaulo ti simbaan a kadagiti programa ken gannuat a mangiyasideg kadagiti tattao iti Dios. Nagbalin nga accolyte ti simbaan. Impamaysana ti panagserbina iti Dios nga awan ti dinawatna a subad iti panagpaayna.

Iti panaglabas dagiti aldaw, kumarkaro ti panagsakit ti ulona. Adda pay dagiti gundaway nga uray la mapalua iti marikriknana. Ngem saan a nagbaliw ti pammatina a maysa nga aldaw, maparukmana ti sakitna babaen ti tulong ti Namarsua. Saanna a binabalaw ti Dios iti panagsagabana no di ket imbilangna daytoy a maysa a pannubok iti kinatibkerna ken iti pammatina iti Namarsua.

“No maysa daytoy a nadagsen a pannubokmo kaniak, awatek, Diosko, ket ibaklayko a sipupuso ken awanan panagduadua,” kinunana.

Maysa nga aldaw, bayat ti panagasistirna iti uneg ti simbaan, napukaw ni Mang Ando ti puotna. Intarayda iti ospital.

“Nadanonen ti taning ti biag ni Mang Ando,” kinuna ti doktor ken ni Padre Almoneda, ti kura paroko. “Maysa nga oras laengen ti panagpautna ditoy rabaw ti daga.”

Nagkuti ti bibig ni Mang Ando. Ngem saan a naawatan ti doktor. Insenias ni Mang Ando ken ni Padre Almoneda nga umasideg.

“Padre, tulongannak nga agkararag,” arig-arasaas ti timekna. “Kayatko pay ti agbiag. Adu pay ti kayatko a matulongan.”

Makalulua ti padi a nagtung-ed. Nagparintumeng iti sikigan ni Mang Ando. Nagsiparintumeng met dagiti dadduma a kakaduana ket naggiiniggemda iti ima.

Rinugian ni Padre Almoneda ti nagkararag. Simmurot ni Mang Ando ken dagiti kakaduana. Nasurok a treinta minutos a nagkararagda.

Madamdama, pinisel ni Mang Ando ti ima ni Padre Almoneda sana inyarasaas. “Agyamanak, Father.” Madamdama, inkidemnan ti matana. Impulsuan ti doktor. Awanen ti pitik a mariknana.

Nagdumog ni Padre Almoneda idinto a binay-anna ti lua a nagayus iti pingpingna. Simngay met ti namedmed a saibbek dagiti adda iti abayna.

Pumanaw koman da Padre Almoneda idi makitana ti panaggaraw ti tammudo ni Mang Ando. Pagammuan, immanges ti nauneg ni Mang Ando.

Pinaayaban ni Padre Almoneda ti doktor. Impulsuan daytoy ni Mang Ando. Naklaat ti doktor: agpitpitiken ti puso ni Mang Ando!

Madamdama, bimmangon ni Mang Ando. “Napigsaakon, Father!” kinunana. “Naimbaganakon!”

Saan a mamati ti doktor. Pina-x-rayna ni Mang Ando. Anian a siddaawna idi awanen ti makitana a kanser iti utek ni Mang Ando.

“Milagro!” nayesngaw ti doktor.

Mabalin a pudno, mabalin a saan daytoy nga estoria ni Mang Ando. Ngem adu metten ti nabasbasami a limmaing iti sakitda babaen ti kararag. Adda pay dagiti kaso a saan a maipalawag ti siensia no kasano a naimbagan ti maysa a tao babaen ti kararag.

Mamatikami a nabileg ti kararag. Mamatikami a babaen ti kararag, mapaggaraw uray dagiti bantay.

Kuna ti Nasantuan a Libro: “No agkararagka, sumrekka iti siledmo, iserram ti ruangan ket agkararagka a sililimed iti Ama; ta ti Ama ammona dagiti kasapulam, ket gunggonaanka.”#