Footer

SARITA: Nadaraan a linnaaw (Maikatlo a paset)

“Isulonakami koma iti alamidenmi, padle!” kinuna ni Ama Dalmeg.

“Kasaritam dagiti kapurokam nga agtaltalnada,” kinuna ni Padre Cristobal. “Baliwak a kasarita ni Mayor Aguimbag no apay nga ituloyda latta ti proyekto iti baet ti isusupiatyo.”

“Ulayenmi ti lesulta ti pannakisalitam ken ni Mayol Aguimbag, Padle,” kinuna ni Ama Dalmeg. “Kalalagmi a saan koma a daytoy ti gapu ti yaalub-ob ti daga iti adu a dala!”

“Saanmo nga ipalubos a mapasamak dayta, Ama Dalmeg,” nagkintayeg ni Padre Cristobal. “Kas pangamaen ti purokmo, allukoyem dagiti kapurokam a dida mangiwayat iti kinadamsak bayat ti pannakabirok iti solusion iti problemayo.”

“Wen, Padle. Ti la amkek, ti alamiden dagiti pasulot ti mayol wenno ti gobelnadol iti daytoy nga isusupiatmi a pannakapenned ti Kalayan Ambatan.”

Insursurot ni Padre Cristobal ti panagkitana iti likudan da Ama Dalmeg bayat ti napartak a panangpanurnorda iti simmiasi nga akikid a dalan a kumamang iti arsadanan ti bantay iti daya.

Agpayso ti kinuna ni Ama Dalmeg. Agingga nga isu ti pangamaen ti Begnas, agtalinaed ti natalinaay a pannakarisut ti problema. Uray ni Palwew, masiguradona a sumurot iti pagayatan ti amana. Ti pagdanaganna, dagiti pasurot da Mayor Aguimbag ken uray ti gobernador. Narigat a makontrol dagitoy.

Nagsubli ni Padre Cristobal iti kapilia. Nadatnganna ni Mang Ruben a mangur-uray kenkuana. Ni Mang Ruben ti presidente ti gunglo a tumultulong iti simbaan mainaig iti saranay dagiti marigrigat a kalugaranda.

Naammuanna nga adda irusat da Mang Ruben a proyekto, ti panagaramid iti kandela para kadagiti agtagtagibalay tapno adda kanayon a pamastrekanda.

Kaadduan a lumugar iti Legleg ket mannalon. Kalpasan ti pannakaani dagiti pagay, agbalinen a nakaduyangyang dagiti kataltalonan. Addan inrusat da Mang Ruben a livelihood projects dagiti mannalon iti napalabas kas iti panagtaraken iti baboy ken manok. Ita, kayat ti gunglona a mangiwayat iti seminar iti panagaramid iti kandela.

“Nasayaat daytoy a napanunotyo,” nakuna ni Padre Cristobal. “Total, adu ti masapul a kandela ti simbaan, toy parokianton ti maysa a kangrunaan a gumatang iti produktoda.”

“Wen, Padre. Napia la nga adda pangipaayan dagiti babbai iti imatangda a saan ketdi a tong-it ken bingo ti atupagenda.”

“No kasapulanyo ti tulong ti simbaan, agunikayonto latta,” kinuna ni Padre Cristobal.

Kalpasan ti pangngaldaw, naginanaan ni Padre Cristobal ti nagbasa iti Biblia.

Tunggal banag, adda naituding a panawenna ken panawen a maipaay iti tunggal panggep iti sirok ti langit. :

Adda panawen ti pannakayanak, ken panawen ti ipupusay; panawen ti panagmula, ken panawen a panangparut kadagiti naimula;

Adda panawen ti panagpapatay, ken panawen ti panagagas; panawen ti panagrakrak, ken panawen ti panagputar;

Adda panawen ti panagsangit, ken panawen ti panagkatawa; panawen ti panagladingit, ken panawen ti panagsala…

Wen, kinapudno a dinto marubsi uray dagiti kabilegan a parsua ditoy lubong. Maipasngay ti tao, dumakkel a kas iti mula nga agrangpaya, agsabong ken agbunga santo in-inut nga agrakaya iti isisiplag dagiti allawig ken bagyo.

Uray kukuam amin a kinabaknang, saannaka a maisalakan ken ni patay. Dumtengto ti patay a kas iti mannanakaw iti rabii. Dumtengto ti panangukom ket mapagdasigto dagiti mula ken ruot ket mapuoranto ti naud-udi.

Bimmangon ni Padre Cristobal idi makangeg iti nakapsut a tuktok iti ridaw ti kuartona. Inlukatna ti ridaw.

Ni Ama Crispin, ti katalekna iti simbaan.

“Apay kadi, Ama Crispin?” sinaludsodna.

“Adda ni Tomas, Padre. Agrigat kanon ni baketna. ‘Panmo kano pulotan.”

“Ibagam a bumabaakon,” kinuna ni Padre Cristobal.

Naglugan ni Tata Tomas iti traysikel. Pinauna ni Padre Cristobal. Kabalio ti sakayna. Nasaysayaat nga amang daytoy ta naparpardas a dumanon ngem iti traysikel. Nasurok a dua a kilometro ti kaadayo ti Ambuagan a lugar da Tata Tomas. Kabatuan ti dalan ket agkaraisaltek la ketdi ti traysikel a luganna iti dalan.

Iti lima a tawenen ni Padre Cristobal a kura paroko ti Legleg, awan latta ti nagbaliwan ti kalsada a dumanon iti Ambuagan.

Nadamagna iti kallabes nga adda nailatang a pondo para iti pannakasemento ti kalsada. Adda met idi dagiti nalabsanna a naigambor a dardarat ken bato iti igid ti kalsada. Ngem nagpatinggada lattan dita nga inyanud ti danum idi matutudo.

Nakapsut unayen ni Nana Masing a nadanonda. Agpayso, kalpasan ti panangpulot ni Padre Cristobal, nauyosen ti biagna.

“Ala, dimo ladingiten unay ti ipupusay ni Nana, Tata Tomas,” kinuna ni Padre Cristobal. “Masisinuok nga iti daytoy a darikmat, addan ni Nana iti taeng ti Namarsua.”

“Agyamanak, Padre, ta nayanusmo nga immay pinulot ni baket. Dakkel a pukawko ti ipupusayna ngem patiek a nakapudno iti Namarsua.”

Inayaban ni Tata Tomas ti barona ket imbilinna a tiliwenna ti maysa a dumalaga nga iyawid ni Padre Cristobal.

“Saanen, Tata Tomas,” kinuna ni Padre Cristobal.

Nalamiisen ti puyupoy idi agpakada ni Padre Cristobal. Kayat ni Tata Tomas a kumuyog ti barona ngem nagkitakit ti padi.

Pinaginayad ni Padre Cristobal ti kabalio idi makatapaw iti turod. Manipud ditoy, impalawlawna ti panagkitana. Nagsaltek ti panagkitana iti daya, iti arsadanan ti dua a kasla nagbisngay a bantay. Dita ti yan ti purok a Begnas.

Sinallukoban ti lidem ti rupa ni Padre Cristobal. Iti batog ti purok, nangisit dagiti ulep. Napigsa a tudo ti ipakpakdaar dagiti ulep. Tudo a mangited iti ep-ep kadagiti nagrengngat a daga wenno tudo a mangparnuay iti kinadamsak ti agdinakkel a karayan a manglayus kadagiti kataltalonan?

(Adda tuloyna)

Comments are closed.