Footer

Total ban iti paputok iti Vigan City, counter proposal ti bise mayor

VIGAN CITY – Total ban iti paputok itiVigan City, daytoy ti counter proposal ti bise mayor ditoy iti naidatag nga ordinansa a mang-regulate iti pannakailako ken panagusar iti paputok ditoy.

Kinuna ni Vice Mayor Franz Ranches a daytoy ti counter proposalna iti ordinansa nga indatag ni Konsehal George Villanueva a ma-regulate ti panaglako ken panagusar iti paputok iti siudad ti Vigan gapu iti “maob-obserbatayo nga isu (paputok) ti gapu kadagiti aksidente ken didigra” idinto nga innayonna nga adu a klase dagiti magatang a paputok ti depektibo ken uray dagiti makuna a “saan a mangan-ano” ket no dadduma, pumutok lattan uray masinsindian pay laeng.

Ngem kinuna ni Villanueva a nairuar ti proposal a total ban iti paputok iti siudad ngem simmupiat dagiti aglaklako iti paputok agsipud ta mapukawanda iti pamastrekan iti Paskua ken baro a tawen.

Insingasing ketdi ni Villanueva a maipakat ti lima a tawen a transition period santo naan-anay a mayimplementar ti total ban.

Ngem kinuna ti bise mayor a “saantayo pay a sisasagana”, sana innayon nga uray branded ti maysa a paputok, “awan ti assurance a nangato ti level of safetyna” santo napan iti ima ti maysa a menor de edad, iti maysa a nakainom wenno happy-go-lucky, wenno tao nga addaan iti “I don’t care attitude”.

Kinuna ni Ranches a “kasapulan ti education campaign iti responsible a panagusar iti paputok agingga iti madanon ti level of maturity dagiti agus-usar iti paputok”.

Sagudayen ti ordinance a limitado ti aldaw a panaglako iti paputok iti 15 nga aldaw manpud diti Disiembre 16 agingga iti Disiembre 31 ken mailakoda iti maymaysa a lugar iti babaen ti panagmonitor ti PNP ken ti BFP tapno masigurado nga awan ti mailako nga illegal a firecrackers.

Idi Disiembre 31, nauram ti FG Store a nakatayan ti akinkukua gapu iti panagbettak dagiti tagilako a paputok gapu iti panangsindi ti maysa a reveller iti kuitisna kas panangsabatna iti baro a tawen.

Nakasuan iti arson resulting to homicide ni Richard Pugal gapu iti pannakauram ti nasao a pagtagilakuan.#