Footer

BANNER NEWS: Damag a nangabak ni Rafanan iti protestana iti Comelec: “Awan kinapudnona,” Chavit

VIGAN CITY – “Awan kinapudnona dayta a damag,” daytoy ti inwaragawag ni Deputy National Security Adviser Luis “Chavit” Singson mainaig iti nagwara a damag itay nabiit nga adda rimmuaren a desision ti First Division ti Commission on Elections a nangpaboranna iti protesta nga impila ni dati a Bokal Efren Rafanan maikontra ken ni Gov. Deogracias Victor Savellano a kinasangona iti kinagobernador iti eleksion idi 2007.

Iti waragawagna a naipatangatang iti DWRS itay Marso 26, kinuna ni Singson a bineripikada ti kinapudno ti nasao a damag iti Comelec ngem naammuanda nga awan pay ti desision a nangabak ni Rafanan.

“Imposible daydiay ta naabak ni Rafanan,” kinuna ni Singson idinto nga innayonna nga ammo ti dati a bokal a naabak ngem imbagana a naulbod iti eleksion.

“Ti rigatna iti dadduma a (kameng ti) media, dida nagberipika sakbay nga inwaragawagda,” imbabalaw pay ni Singson mainaig iti damag a mapapati a naipatangatang iti maysa a broadcast station iti Metro Manila.

Kinuna ti dati a gobernador a “nubenta porsiento” kadagiti nagkandidato a naabak ti mangibaga a nasuitikda iti eleksion ket agprotestada.

Awan ni Gov. Deogracias Victor Savellano ditoy pagilian idi nagwaras ti damag nga addan desision ti Comelec a nangabak ni Rafanan iti panagsangoda iti kinagobernador idi 2007.

Iti opisial a resulta ti Comelec, nakagun-od ni Savellano iti 131,264 a butos idinto a 132,656 ken ni Rafanan wenno iti diperensia a 1,392 a butos.

Inlupek ni Savellano ni Rafanan iti Cabugao a baluartena babaen ti butos a 10,563 maikontra iti 4,581 laeng a butos ni Rafanan wenno iti diperensia a 5,982.

Tinarayan met ni Rafanan ti kinasangona iti baluartena a Sta. Catalina iti 3,205 a butos babaen ti butosna a 4,921 maikumpara iti 1,716 a butos ni Savellano.

Nangipila ni Rafanan iti protesta gapu iti alegasionna a nasuitik iti sumagmamano nga ili ken dua a siudad.

Kinuna ni Singson a “rebbengna a respetaren ni Rafanan ti pannakaabakna” a kas met iti panangrespetarda no nangabak daytoy iti protestana.

Kabayatanna, iti dayta met la nga interbio, kinuna ti dati a gobernador nga awan ti panggepna nga agtaray a gobernador iti eleksion inton 2010 ngem no “pagsayaatan ti probinsia”, agkandidato manen.

Kinuna ni Singson a napintas ti masakbayan ti probinsia agsipud iti kaasidegna iti China ken immadu ti kontakna iti nasional ket umadu ti agibaut iti negosio iti probinsia a mangted iti ad-adu a pagsapulan.#

Comments are closed.