Footer

Deliberasion ti water rate increase, naipakni

CABUGAO, Ilocos Sur – Naipakni pay laeng ti deliberasion ti pannakaipangato ti singir ti danum ditoy kalpasan nga inannugot ti maysa nga opisial ti Cabugao Waters a nakiddit ti danum nga agturong kadagiti pagtaengan iti sumagmamano a barangay ditoy.

Daytoy ti nagbalin a desision ti konseho ditoy kalpasan a kinumpirmaran ni Engineer Nestor Somera ti Cabugao Waters nga adda panagkapsut ti danum a dumanon kadagiti kabalbalayan iti sumagmamano a barangay a pakairamanan ti poblasion ditoy.

Kiniddaw ketdi ni Somera a maipasdek ti maysa a water intake tapno adda tumulong iti pannakapaadda ti danum kadagiti gripo.

Sakbayna, nagreklamo dagiti agindeg iti sumagmamano a barangay a pakairamanan ti Barangay Cacadiran, Nagsingcaoan, Carusipan, Cuantacla gapu ta angin met ti ipugso ti gripoda a saan ketdi a danum ken dagiti barangay iti poblasion ditoy kas iti Barangay Baclig ken Rizal gapu ta nakiddit ti danum iti gripoda.

Nagbalin a nabara nga isyo ditoy ti gannuat a pannakaipangato ti singir ti danum iti baet ti alegasion a maipakat daytoy tapno adda pagbayad ti gobierno munisipal iti utangna iti maysa a bangko ken kaadu dagiti consumers a delingkuente nga agbayad iti makunsomoda a danum.

Adu a konsehal ti saan a pabor a maingato ti singir ti danum ket daytoy ti mapapati a nakaigapuan ti saanen a pannakaited ti benepisio dagiti opisial ditoy a grants and donations.

Nupay kasta, impila manen ni Konsehal Jessie Pat Serna ti gakat a mangingato iti singir ti danum idinto nga impettengna a saanen a kasapulan ti sabali pay a public hearing agsipud ta addan naisayangkat iti napalabas ket immanamong dagiti residente iti water rate increase.

Ngem kinuna ni Vice Mayor Rex Morales a natayen ti immuna a gakat ket kasapulan manen ti sabali a public hearing para iti gannuat a pannakaipangato ti singir ti danum agsipud ta saan a naibaga ti pudno a gagem ti water rate increase.

Kinuna pay ni Morales a dina pirmaan ti gakat no awan ti maisayangkat a public hearing.#