Footer

EDITORIAL: Naan-anay a suporta ti kasapulan ti sports program

Itay nabiit, naangay ti maysa a miting iti nagbaetan ti gobierno ti siudad ti Vigan ken dagiti agtuturay, coaches, ken trainers ti Department of Education city division gapu iti panagkutit ti delegasion daytoy a siudad iti Ilocos Region Athletic Association Meet a naangay iti Dagupan City itay laeng Pebrero.

Nupay programa ti DepEd ti pannakisalipna iti IRAA, dakkel a didigra iti biang ti Vigan City government daytoy a panagabog dagiti atleta iti nasao a paay-ayam a nakisalipan dagiti nadumaduma a probinsia ken siudad iti rehion. Ngamin, imbagian dagiti atleta ti Vigan City iti pannakisalipda iti nasao a paay-ayam. Iti daytoy a panagkutitna, agparang a kasla nabaybay-an ti benneg ti isports iti sanguanan ti maipagtangsit a gapuanan dagiti agtuturay kadagiti nadumaduma a benneg iti governance. Itay laeng nabiit, napili ti Vigan City iti nailian a salip a kas most friendly-city iti kategoria dagiti component cities iti pagilian. Nagtignay ngarud ti city government tapno ammuenna dagiti problema no apay a nagkutit ti Vigan City iti IRAA.

Iti bukodmi a panirigan kalpasan dagiti nairuar bayat ti miting, makunami a para tungpal bilin laeng ti programa ti sports ti city division. Awan ti naan-anay a suporta a naited kadagiti atleta, coaches, ken trainers agsipud ta posible a nakagalut ti ima dagiti dadaulo ti dibision iti pagannurotan ti DepEd mainaig iti sports.

Saan nga asi-asi ti mangisagana ti maysa nga sports program no awan ti naan-anay a suporta ken pondo manipud iti dibision, malaksid laeng iti pondo nga it-ited ti city government.

Kasano nga umasenso ti maysa nga atleta no makurkurangan iti tiempo nga agsanay ta saan met a mapalubosan bayat ti school hours? (Agasem, dua lawas laeng ti aktual a panagsanay dagiti atleta ti city dibision!)

Kasano a lumaing ni atleta no di man la maibaon kadagiti pasalip tapno mapadur-asna ti kabaelanna iti sports a pakisalipanna?

Kasano a dumur-as ti maysa a coach wenno trainer no di met agatendar kadagiti workshop, training ken sports clinics tapno manayonan ti kadaanan nga ammona maipapan iti panangsanay ken panangpatanor kadagiti atleta?

Kasano nga aguyas ti maysa nga sports program no agkurang met ti pondo ken pasilidad ken ramit nga aramaten dagiti atleta sakbay a maibaonda kadagiti paay-ayam?

Umabuloykami iti proposal ni Dr. Velasco a mangibaon laeng ti dibision iti basbassit a bilang dagiti makisalip nga atleta ngem addaanda iti tsansa a mangabak iti tay-ak a pakisalipanda.

Kas iti Oympics, saan kadi a dagiti laeng sports nga adda pangnamnamaan a pakamedaliaan ti pagilian ti naibaon a makisalip?

Mamatikami a panagburbor laeng iti pondo ti panangibaon kadagiti atleta nga agabog laeng iti pakisalipanda.

Basbassit a bilang dagiti atleta, kuna ni Dr. Velasco. Agpayso ngem no isuda laeng ti adda gundawayna a mangabak, apay a di daytoy ti surotentayo?#

Comments are closed.