Footer

General Services Office, naballaagan a mangiwayat bidding dagiti agas

VIGAN CITY – Binallaagan ti hunta probinsial ti hepe ti opisina nga akinrebbeng iti pannakagatang dagiti suplay ken ramit a kasapulan ti gobierno ditoy a pakairamanan ti agas a mangiwayatda iti bidding tapno saan nga agtungpal a nanginngina ti presio dagiti agas a mailako kadagiti ospital ngem dagiti magatang iti ruar.

Kinuna ni Vice Governor Jerry Singson a pinalagipanda ti kaddutok a General Services Officer a didan kayat a maaramid ti natakuatanda a kaawan ti bidding dagiti medisina para kadagiti nadumaduma nga ospital iti probinsia a nagtungpal iti nanginngina a presioda ngem dagiti agas a mailaklako iti ruar.

Sakbay a nadutokan itay nabiit ni Estrella Mercurio a baro a GS officer, isu ti OIC ti nasao nga opisina kalpasan ti panagretiro ti hepeda a ni Napoleon Verzosa itay napan a tawen.

Segun iti bise gobernador, ti General Services Office ti makaammo iti bidding, pannakagatang ken pannakapaadda dagiti amin a masapsapul ti gobierno probinsial a kas dagiti office supplies ken equipments a pakairamanan dagiti agas a para kadagiti ospital iti probinsia.

“…Iti napalabas, naduktalanmi a nanginngina ti panaglakoda kadagiti agas iti uneg ti ospital ngem iti presio dagiti agas iti ruar,” kinuna ti bise gobernador.

Ngem inlawlawag ni Singson a saan nga anomalia dagiti ospital a nanginngina ti lakoda nga agas ta awan ti mabalin dagiti doktor agsipud ta simmangpet lattan dagiti agas iti ospitalda.

“Saan nga anomalia dagiti hospital daytoy…anomalia ti kapitolio daytoy,” panangilawlawag ni Singson.

Ngem saan nga innaganan ti bise gobernador no asino ti adda iti likudan ti mapapati nga anomalia iti agas.

Kinuna ni Singson a natakuatanda a duan a tawen nga awan ti naiwayat a bidding kadagiti agas para kadagiti ospital ti probinsia.

“Saanna a rebbeng daydiay… dapat mamindua (bidding) iti makatawen ta agbaliwbaliw met ti presio dagiti agas,” kinuna ni Singson.

Kinuna ni Singson a rebbengna a maiwayat ti bidding a presente dagiti doktor dagiti ospital agsipud ta isuda ti makaammo kadagiti agas ken iti kredibilidad dagiti makibid a kompania ti agas idinto nga innayonna nga adda pay kiddawna nga iti mismo nga ospital ti pakaiwayatan ti bidding.

Inyunay-unay ti bise gobernador a kasapulan a mabantayan ti pannakabid dagiti agas tapno “maparuar ti umisu, maparuar dagiti legal ken dagiti adda kalidadna nga agas” ti magatang.

“Saan a mabalin a nanginngina ti agas iti ospital. Masapul a nalaklaka ti agas iti uneg ti ospital ngem iti ruar,” inwaragawag pay ni Singson bayat ti programana a Kakibin ti Balligi idinto nga indagadagna kadagiti umili nga ireportda kadakuada nga opisial ti gobierno probinsial no nanginngina ti agas a gatangenda iti ospital ngem iti ruar.#