Footer

Lider ti NPA, asawana, simmuko iti turay

SAN FERNANDO CITY – Simmuko ti maysa a nangato a lider ti gunglo a bumusbusor iti gobierno ken ti asawana iti polis iti Ilocos Sur idi Marso 15, inwaragawag ti PNP regional director ditoy.

Innaganan ni Police Chief Supt. Ramon V. Gatan, regional director, dagiti simmuko a da Melecio Biscarra Bragas, 48, residente iti Kalao, Bucay, Abra, alias Ka Roque/ Ka Nato, team leader ti Sangay Yunit Propaganda (SYP) iti babaen ti Kilusang Larangang Gerilya (KLG) Medina, ken ti asawana a nainaganan a Lucia Alba Habahab, 26, tubo ti Milagros, Masbate, alias Ka Liza/Ka John, agpapaay a medical officer ti nasao a grupo.

Sakbayna, naipresenta dagiti surrenderee ken ni National Security Adviser Luis “Chavit’ Singson a nangipatalged a maikkanda iti tulong ken suporta iti panagaplikarda iti amnestia.

Segun iti report, simmuko dagiti agassawa kadagiti elemento ti 103rd Police Provincial Mobile Group (PPMG) ken Ilocos Sur Police Provincial Office (ISPPO) iti junction road iti Narvacan, Ilocos Sur idi Marso 15 babaen ti pannakinegosiar ti dati a dadauloda a ni Edgardo Molina, alias Ka Dong.

Awan ti armas nga insuko dagiti dua.

Kinuna ni Gatan a napadaras ti isusuko dagiti agassawa kas panangipakita ni Molina ti ayatna a tumulong kadagiti dati a kakaduana ken kalpasan ti panangted ni Deputy National Security Adviser Luis “Chavit” Singson iti pammatalged a maikkan dagitoy ti tulong manipud iti gobierno.

Naaresto da Molina, Balawag ken Rosemarie Domingo, alias Ka Ramses, medical officer ti KLG North Abra babaen dagiti isu met laeng nga elemento ti PNP idi Disiembre 1, 2008 iti maysa a mining camp iti Barangay Buney, Lacub, Abra.#

Comments are closed.