Footer

Nauram a bangkay, binigbig ti kabsatna

SANTA MARIA, Ilocos Sur – Kapkapnekan ti maysa a babai a ti kabsatna ti nauram a bangkay a nasarakan iti sanguanan ti kamposanto ditoy nga ili.

Kinuna ni Flora Callejo Cabradilla a dida dagus a nabigbig ti bangkay gapu iti nakaro a pannakauramna ngem “100 porsiento” a ti kabsatda ti nauram a bangkay nga imbellengda iti sanguanan ti kamposanto ti Sta. Maria.

Segun ken ni Callejo, saanen a naggawid ni Felix Callejo, 34, agnaed iti San Pedro, Narvacan manipud idi napan nakipiesta iti Barangay Nanguneg.

Kinuna ni Flora a siguraduennan a ni Felix ti bangkay kalpasan a nakitada ti bado a suotna iti asideg ti nakapuoranna.
Immun-una iti daytoy, binigbig ti maysa nga ama a taga-Tagudin, Ilocos Sur a ti anakna ti napuoran a bangkay.

Segun ken ni Reynaldo Cuaresma, ti anakna a ni Rey ti napuoran a bangkay agsipud iti bukol iti ulona.

Ngem imbabawi met laeng ti ama ti statementna iti polis gapu ta sibibiag gayam ti anakna.#