Footer

SARITA: Nadaraan a linnaaw (Maikapat a paset)

nakadalapdapen ti sipnget idi makasangpet ni Padre Cristobal iti kombento. Apagdissaagna iti kabalio, immasideg kenkuana ni Ama Crispin.

“Immay da Lucia ditoy, Padre,” kinuna ni Ama Crispin. “Binirbirokdaka. Adda kano napateg a pagpapatanganyo.”

“Dina la nadakamat no ania, Tata?”

“Maipanggep iti paggiinoman nga aglukat kano tatta a rabii.”

Naapiras ni Padre Cristobal ti timidna. Ti la ketdi maipatpatakder a beerhouse iti Purok Bellas ti dakdakamaten ni Ama Crispin.

Adda nadakamat idi naminsan a lawas ni Manang Lucia, pangulo ti Children of Mary, a kaadda ti maipatpatakder a beerhouse iti pagbeddengan ti Bellas ken Begnas. Nabasana pay ketdi ti petision nga ipaspasiar ni Manang Lucia a papirmaan kadagiti kalugaranna a mangkontra iti pannakaipatakder ti nasao a beerhouse. Indagadagna pay ketdi ti madagdagus a panagpapirma da Manang Lucia kadagiti kalugaranda tapno idauluanna ida a mangited iti petision ken ni Mayor Aguimbag.

Sabali manen a pakabuongan iti ulo, immapay iti panunotna.

No agpayso a manglukat ti beerhouse tatta a rabii, saan a masdaaw ni Padre Cristobal iti nadaras a pannakaited ti permiso ken ni Zac Macaraeg, ti akinkukua iti beerhouse, para iti operasionna. Damag ni Padre Cristobal nga asideg a kabagian ni Mayor Aguimbag ni Macaraeg.

Nagkaem dagiti bibig ni Padre Cristobal. Awan kadin ti nabatbati nga etika ni Mayor Aguimbag ta ipalubosna a tumakder pati dagiti negosio a makailuod ken pakaisagmakan dagiti lallaki iti lugarda? Uray kasano a panangikalintegan ni Mayor Aguimbag, puon ti pakarakrakan dagiti pagtaengan ti kaadda ti beerhouse a pagayuyangan la ketdi dagiti nababa ti moralna a babbai. Kasapulan a mapasardeng ti operasion ti beerhouse agsipud ta agbalinto daytoy nga apon ti prostitusion ken taudan dagiti krimen.

Kellaat a simngay ti saludsod iti panunotna: adda kadi koneksion ti beerhouse iti maipatakder a penned? Nairanta kadi ti beerhouse a paglinglingayan dagiti traba-hador, nangruna dagiti bataan ti kontraktor ti proyekto?

Nagbuelta ni Padre Cristobal ket simrek iti nailet a siledna. Sinindianna ti pagsaingan. Kasla mannala ti apuy iti siplag ti puyupoy nga aggapu iti kabakiran iti daya.

Nagwingiwing ni Padre Cristobal. Agingga ita, awan pay ti koriente iti Legleg. Kaadduanna a pagsaingan wenno hasag ti silaw dagiti lumugar. Ti laeng pagtaengan ni Mayor Aguimbag ti naraniag ta adda generator nga usarenna.

Manon nga agtuturay ti nangikari nga inton tumugawda, ti pannakasilaw ti Legleg ti umuna a tamingenda?

Iti kaudian nga eleksion, inlayon dagiti taga-Legleg ni Mayor Aguimbag gapu ta ti pannakasilaw ti ilida ti maysa kadagiti inkarina nga ipatungpal. Ngem agingga ita, awan pay makita uray maysa a poste a naipatakder ket umasideg manen ti eleksion.

Ti kadi pannakapenned ti Karayan Ambatan ti sungbat dagiti agtuturay tapno masilawan metten ti Legleg ken mapasayakan dagiti kataltalonan iti baba?

Pabor ni Padre Cristobal a dumanon ti elektrisidad iti Legleg bareng dumur-as metten daytoy matmaturog nga ili. Ngem saan a pabor a sumangbay ti panagdur-as babaen ti pannakaisakripisio ti sibubukel a Purok Begnas ken kabangibangna a purok.

Innala ni Padre Cristobal ti Bibilia iti rabaw ti bassit a lamisaan ket inukradna. Kastoy ti nakairuaman ni Padre Cristobal nga aramid iti sarsardam. Saan a kumpleto ti aldawna no saan nga agbasa iti Biblia.

Ngem saanna a maipamaysa ti basbasaenna. Umag-agibas iti panunotna ti problema dagiti taga-Begnas a pakairamanan dagiti mannalon nga adda daga a suksukayenda iti babaen ti Karayan Ambatan.

Naamil ni Padre Cristobal ti bibigna. Adu ti maapektaran a lumugar iti daytoy a gannuat ti gobierno a mangpenned iti Karayan Ambatan, nangruna kadagiti adda suksukayenda a daga.

Maysa ni Andres, ti anak ni Ama Crispin, a maapektaran iti pannakapenned ti karayan Ambatan. No pudno ti nadamagna, madalanan ti maaramid a kalsada nga agturong iti maipatakder a penned ti bangkagna. Agpayso, gatangen ti gobierno ti masalapon ti kalsada a daga ngem nalaka la ketdi ti panggatangna. Anianto pay ti talonen ni Andres?

Intangep ni Padre Cristobal ti Biblia. Timmakder ket inlukatna ti tawa. Imbakalna ti panagkitana iti kasipngetan, iti paset a namnamaenna a yan ti purok a Begnas. Ania ti ar-aramiden dagiti pumurok? Ania ti agtartaray iti panunot ni Ama Dalmeg?

Agbuelta koman idi adda nariparna a kasla nagkuti iti panipngeten a paset iti nagbaetan ti dua a kayo iti sikigan ti kombento.

Saan a nagkutkuti ni Padre Cristobal iti nagtakderanna. Pinatademna ti panagkitana.

Madamdama, nasiputanna ti maysa nga anniniwan nga immadayo.

Nagkuretret ti muging ni Padre Cristobal. Ania ti kukueen ti tao iti nasipnget a paset ti sikigan ti kombento? Adda sipsiputanna?

(Maituloyto)

Comments are closed.