Footer

Tradisional a ritual ti Begnas, naiwayat iti panaglukat ti piesta ti Galimuyod

GALIMUYOD, Ilocos Sur – Kas panagyamanna iti adu a parabur nga imburay dagiti didiosen, inwayat ti lokal a gobierno ditoy ti ritual a Begnas (bendision nga agnanayon) iti panaglukat ti panagpiesta daytoy nga ili idi Marso 18.

Impabuya dagiti kameng ti tribu iti maysa nga upland municipality ti Ilocos Sur (ngato) ti maysa a ritual kas panagyaman iti napintas nga apit iti pannakarambak ti Begnas Festival nga inangay ti gobierno probinsial iti Candon City itay napan a tawen. (Arlon Serdenia/Danny Antalan)

Impabuya dagiti kameng ti tribu iti maysa nga upland municipality ti Ilocos Sur (ngato) ti maysa a ritual kas panagyaman iti napintas nga apit iti pannakarambak ti Begnas Festival nga inangay ti gobierno probinsial iti Candon City itay napan a tawen. (Arlon Serdenia/Danny Antalan)

Iti panangidaulo ni Mayor Jessie Balingsat, dagiti panglakayen, ken ni Benjamin Martin, paludan (padi ti tribu), indaton dagiti umili ti maysa a baboy ken manok iti maysa a bantay iti Barangay Calongbuyan a pakasarakan iti bato a pagpatayan. Ditoy nga indirdir-i dagiti kameng ti tribu a Tinguian ti nagan ni Kabunian (Dios sadi Langit) ken Lumawig (Dios a nagtagilasag a nagpakita kadagiti immuna a kaputotanda) ket dinawatda ti agtultuloy a bendision dagitoy a didiosen iti ilida ken ti agnanayon nga ubbog a mangtaginayon met iti kaputotanda.

Karaman ti ritual ti pannakaipakita ti pito a simbolo ti pammatida a kas iti kalasag (talged), bato (naggapuan ti ubbog), gayang (panagkikinnaasi), pana (panagiinnayat), sarukang (panagkaykaysa/kararag), dakulap (linteg/panagayat ti Dios), ken runo (gunggona ken biag nga agnanayon).

Segun ken ni Ama Benjamin Martin, ti 78 ti tawenna a paludan, saan a rumbeng a paritan dagiti sekta ti relihion ti panangisayangkatda iti ritual ti Begnas ta nupay awan daytoy iti Biblia, ti met Dios ti pagdaydayawanda a saan ket a ti sairo a kas ibagbaga ti dadduma.

“Maymaysa laeng ti Dios a pagdaydayawantayo. Sabali laeng ti awagmi ken ti wagas ti panagdaydayawmi kenkuana. Rumbeng nga irespeto dagiti Kristiano dagiti kannawidanmi ket saan koma a rumbeng a maipapaigidkami,” kinuna ni Martin.

Kinuna ti lakay a maysa daytoy a gapu no apay a simmina ti Galimuyod iti Candon idi nagbalinen a Kristiano dagiti agnaed ditoy ta mariknada ti diskriminasion kadakuada a saan a nayat nga agpabuniag.

Kinuna met ni Mayor Jessie Balingsat a bibiagenda daytoy a tradision ti pulida tapno mataginayon uray awanton dagiti lallakay. Kayat ti agkabannuag a mayor nga ipamatmat dagiti agtutubo a kameng ti tribuda ti kinapateg ti nakainsigudan a tradisionda.

“Idi 1999 ti naudi a panangisayangkat ti ili iti Begnas. Dakkel a talaga a gapu ti panangikalikagum dagiti sekta a maisardeng daytoy isu a kasla maaw-awanen daytoy. Sapay koma ta saan a mapasakitan dagiti sekta a komunkontra iti panangisublimi iti daytoy a paset ti kulturami,” kinuna ni Balingsat.

Indawat pay ti mayor ti kooperasion dagiti ubbing ken agtutubo ken sursuruenda no kasano nga isayangkat ti ritual ti Begnas agraman dagiti kanta, sala ken panagtokar iti instrumento ti tribu tapno saan a mapukaw daytoy a pakaam-ammuan ti tribuda.#

Comments are closed.