Footer

EDITORIAL: Masapul a salaknibantayo itan ni Mother Earth

Naiddep ti silaw iti nadumaduma a paset ti lubong manipud alas 8:30 agingga iti alas 9:30 iti rabii itay Marso 28. Naawagan iti Earth Hour, nagbalinen daytoy a sangalubongan a pagteng a maisayangkat iti maudi a Sabado ti Marso tunggal tawen .

Ininaw ti World Wide Fund for Nature (WWF), maysa nga internasional non-government nga organisasion nga agipabpablaak kadagiti isyo mainaig iti konserbasion, panagsukisok ken pannakaisubli iti dati ti aglawlaw, ken ti Sydney Morning Herald, kalakayan a pagiwarnak iti Australia, daytoy a gannuat tapno makulding ti rikna dagiti agnaed iti daytoy Lubong a kakaisuna a taengtayo nga agtignay tapno malapdan ti panagbalbaliw ti klima.

Idi 2007, agdagup iti 2.2 milion nga agnaed iti Sydney ti nakipartisipar iti daytoy a gannuat babaen ti panangiddepda amin dagiti saan a kasapulan a silawda.

Gapu iti panagballigi daytoy a gannuat, idi Marso 29, 2008, agdagupen iti 35 a pagilian iti sangalubongan ken nasurok a 400 a siudad ken mapattapatta a 36 milion a tattao ti nakipartisipar iti Earth Hour, pammaneknek a simmuyop ti awareness dagiti tattao kadagiti isyo mainaig iti panagbalbaliw ti klima.

Ita a tawen, agdagupen iti 88 a pagilian ken nasurok a 4,000 a siudad ti nakipartisipar iti Earth Hour.

Ninamnama dagiti organizers nga umabot iti maysa a bilion dagiti mangiddep iti silawda iti maysa nga oras kas pannakipasetda iti gannuat a mangtiped iti panagbalbaliw ti klima iti lubong.

Idi napan a tawen, segun iti Philippine Electricity Market Corp., bimmaba ti power consumption ti Pilipinas iti aganay 16 megawatts iti Metro Manila ken aganay 56 megawatts iti Luzon.

Ita a tawen, makaparagsak ta naammuanmi a ti Pilipinas ti kaaduan iti bilang ti nakipartisipar iti Earth Hour babaen ti 647 a siudad ken il-ili ken mapattapatta a nasurok a 15 milion a tattao a timmipon a nangiddep iti silawda manipud iti 8:30-9:30 ti rabii itay Marso 28.

Saluduanmi dagiti minilion a Filipino a nakipartisipar iti daytoy a gannuat tapno malapdan ti climate change a maitudtudo ta a makagapu kadagiti at-atiddog nga igaaw, napigpigsa a bagyo a nangisangbay kadagiti layus, ken nangungaw kadagiti biag ken nangdadael kadagiti sanikua, kumarkaro nga ibabara ti lubong a mangmangted kadagiti sakit ken mangpatpatay kadagiti tattao ken in-inut a panagrunaw dagiti icebergs ken glaciers iti Antartica nga agtungpal la ketdi iti ilelenned dagiti ababa a pagilian iti sangalubongan.

Ta saan a malibak a gapu iti panangabuso dagiti tattao iti aglawlaw, agturturong ti Lubong iti pannakadadael ken pannakaungaw.

Mangnamnamakami nga iti sumaruno a tawen, ad-adunto manen a pagilian ti makipartisipar iti Earth Hour. Wen, maymaysa ti lubongtayo, masapul nga agtignaytayo a mangsalaknib kenkuana. Masapul nga agtitipon ken agtitinnakunaynaytayo itan a mangsalbar iti kakaisuna a pagtaengantayo.#