Footer

Fetus a nasarakan iti uneg ti bus, naitabon

VIGAN CITY – Naitabon iti Simbaan a Bassit ditoy ti maysa a fetus a nasarakan iti uneg ti maysa a bus idi Marso 30.

Sakbay a naitabon, minisaan ken binuniagan ni Msr. Roque Reyes, kura paroko ditoy, ti fetus iti nagan nga Angelo Leonardo iti alas onse iti St. Paul Cathedral.

Karaman dagiti immatendar iti misa dagiti kameng ti polis ditoy siudad, Knights of Columbus, ken sumagmamano a kameng ti media.

Iti sermonna, impeksa ni Reyes ti nakana a lidayna iti napasamak iti maysa nga inosente nga ubing gapu iti kinairesponsible ti inana a nangibati kenkuana iti uneg ti maysa a bus.

Kalpasan ti misa, naitabon ti fetus iti maysa a paset ti Simbaan a Bassit a naituding a pakaitabonan dagiti naabandona nga ubbing.

Nasarakan ni Danilo Gil Mayo, drayber ti Partas bus, residente iti San Fernando City, ti fetus a naibati iti maikapat a tugaw ti minanehona a bus a naggapu iti Manila idi agdalus iti uneg ti lugan.

Suspetsa ti drayber a maysa a babai a limmugan iti San Fernando City ti nangibati iti fetus a naikabil iti uneg ti lata a gatas a nabungon iti plastik bag.

Segun iti drayber, sumagmamano a pasahero ti limmugan iti San Fernando nga agturong ditoy siudad.

Kabayatanna, innalan ti lola ti apokona iti ospital a nakaipananna kalpasan nga imbati daytoy ti menor de edad nga anakna iti sango ti maysa a balay iti Cabaruan, Piddig, Ilocos Norte.

Nasarakan ti maladaga a nabungon iti puraw a lampin ken daradara pay laeng a naabandona iti sanguanan ti maysa a balay iti nadakamat a barangay.

Segun iti report, dimmawat iti pammakawan ni Flor (parbo a nagan ti menor de edad) iti inana gapu iti panangibatina iti anakna iti sango ti maysa a balay kalpasan ti panaganakna.

Naduktalan ti baket a nagpasngay ti anakna gapu ta mapapati a nakitana ti kadkadua ti ubing iti uneg ti banio.

Mapapati a di nadlaw ti baket a nagsikog ti anakna gapu ta panglukmegen daytoy.#