Footer

Hitman ti masuspetsa a nanggudas iti barangay kagawad, barito

STO. DOMINGO, Ilocos Sur – Sumagmamano nga anggulo a pakairamanan ti panagkameng ti biktima iti maysa a liquidation squad ken dagiti nakaidarumanna a kaso ti kitkitaen dagiti inbestigador iti pannakapapatay ti maysa a kagawad ti barangay ditoy ken ti kinasakayna a barito idi Marso 31.

Kinuna ni Police Senior Inspector Arsenio Ramos, hepe ti polis ditoy, nga adda dagiti kaso a murder a nakaidaruman ni Felix Joel Arquero y Cabacungan, 38, naasawaan, tubo ti Camangaan, Sta. Cruz, Ilocos Sur ngem naikamang iti Barangay Calay-ab ditoy nga ili.

Kinuna ni Ramos a tallo a kaso ti murder ti mapapati a nakainbolbaran ni Arquero ken addan panaggandat iti biagna iti kallabes ngem nalasatanna dagitoy.

“Dagitoy ti kitkitaenmi nga anggulo a pagtitiponentayo tapno maestablisartayo ti lead iti panagimbestigatayo,” kinuna ni Ramos.

Pinaltogan ti di pay nabigbig nga armado a lalaki ni Arquero bayat ti iruruarda iti galiera iti Barangay Casili ditoy ken nakairamanan ni Mark Kevin Tacazon, 13, agbasbasa iti sekundaria ken kalugaran ni Arquero.

Mapapati nga idi natumba ni Arquero, inasitgan ti suspetsa sana inuloyan.

Kalpasanna, simmakay ti suspetsa iti agur-uray a motorsiklo a minaneho ti sabali a kaduana ket naglibasdan nga immadayo.

Naideklara a dead on arrival ni Arquero idi maidanon iti Tolentino Clinic and Hospital.

Kinuna ni Ramos a sabali pay nga anggulo a kitkitaenda no panagibales wenno aramid ti ABB nga agdakdakiwas iti rehion uno ti pammapatay.

Mapapati a kameng idi ti ABB ti biktima ngem pimmanaw iti grupo ken nabutosan a kagawad ti barangay.

Kinuna ni Ramos nga adda impormasion a sursurotenna a mapapati a kadua met laeng ni Arquero ti pimmaltog kenkuana.

Segun iti COP, naisalpika ti maysa a kabagian ti biktima a ti physical description ti nangpaltog iti biktima ket maiyataday iti lalaki a maysa kadagiti kadua ni Arquero iti naminsan nga idadagasda iti Sulvec, Narvacan .

Segun iti hepe, mapapati nga am-ammo ni Arquero ti pimmaltog kenkuana ta idi adda iti galiera, naisalpikana iti maysa a di nainaganan a mammallot nga “adda met gayam ditoy dagiti tirador”.

Innayon ti hepe a posible a nakadlaw ni Arquero isu a saanen a nagbayag iti galiera ngem idi pumanawdan, mapapati nga addan ti suspetsa a mangdadaan kenkuana iti ruar.#