Footer

INDAYON NI LAGIP: Dua a Babai iti Biagko (Tuloyna)

Nakaawatak iti surat manipud iti Philippine National Police Academy a maysaak kadagiti napili nga agbasa para iti kinaopisial. Malaksid iti kinamaestro, ambisionko ti agbalin a polis. Ngem saannak a pinalubosan ni baket. Kinunana a napeggad ti biag ti polis ket agisuroak laengen iti lugarmi. Dayta ti gapuna a saannakon a napan nagbasa iti PNPA.

Nagbirokak iti trabahok. Naalaak a trainee iti maysa a broadcast station. Para surat iti news.

Ti rigatna, iti kaaddak iti radio, immadu dagiti nagsurat a babbai kaniak. Uray ni Kristal, gimmaget a nagsurat kaniak. Pasaray awagannak iti telepono no makalagip. Diak met makaliklik a di sungbatan ta ipasa a dagus dagiti katrabahuak ti telepono kaniak no ni Kristal ti timmawag.

Nasubok payen ni Kristal ti umay agpasiar iti estasion a pagtrabahuak. Idi damok a makita, ad-addan nga immasideg ti riknak kenkuana. Adda pamuyaanna. Karuprupana ni Leila Hermosa.

Pagsayaatanna ta kaduana latta ti maysa a kaklasena. Diak kayat nga agwayaskami. Mabutengak amangan no adda mapasamak kadakami no duduakami.

Awan ti pannakaammo ni baket nga adda pumaspasiar kaniak a balasang iti pagtrabahuak. Adda met amakko iti agbalin a reaksionna no maammuanna nga iti baet ti kaaddan ti pamiliak, adda pay la sabali a babai a pangit-itedak iti panawenko.

Ngem diak ammo no apay a diak maitured nga ilatak ken ni Kristal ti pudno. Diak kayat a masugat ti riknana. Diak kayat nga aglua. Ngem mabalin a diak kayat a sabali a lalaki ti mangtagikua kenkuana. Kastoy kadi ti kinamanagimbubukodko, Manong Danny?

Maysa nga aldaw, makalawas sakbay ti Paskua, diak ninamnama nga agpasiar ni Kristal iti sarsardam iti estasion. Nabayag a diak nasubalitan dagiti suratna ta nabuntuonannak iti trabahok.

Diakto malipatan dayta nga aldaw, Manong Danny. Ditoy a nagbaliw ti turong ti biagko.

Dandanin alas siete idi ket mabisinakon. Inawisko ni Kristal a mangrabiikami iti maysa a panganan iti asideg ti estasion.

Naragsak ti panagpatpatangmi idi mangmangankamin. Arigmi ti agayan-ayat iti kinaasideg ti tugawmi.

Kalpasan ti panangrabiimi, dinamagko no ania ti gagara ni Kristal kaniak.

Nagbalin a serioso ti rupa ni Kristal. Impalgakna nga adda dakkel a problemana. Kayatna ti agpatulong kaniak.

“Ibagam bareng makatulongak,” nakunak.

“Adda agar-arem kaniak. No dadduma, kayatkon a sungbatan. Ngem no dadduma, agpangaduaak. Matiktikawak. Ania ti aramidek?” kinunana.

“Tingitingem a nalaing ti riknam,” nakunak. “No talaga nga ay-ayatem, saanmon a parigaten, sungbatamon.”

“Ngamin, addan nalimed nga ay-ayatek,” kinuna ni Kristal. “Ur-urayek laeng ti panagpudnona. Saan pay a nagpudno ngem mariknak nga adda panagayatna kaniak.”

Nabayag a diak nakatimek, Manong Danny. Nakitak kadagiti matana a siak ti lalaki a dakdakamatenna.

Iti dayta a rabii, nalipatak nga adda asawak. Iti dayta a rabii, naglemmesak iti saklot ni Kristal!

(Adda tuloyna)