Footer

Mall, dakkel ti maaramidanna iti panagsiudad ti Narvacan: mayor

NARVACAN, Ilocos Sur – Impalgak ni League of Municipalities of the Philippines Ilocos Sur Chapter President ken Narvacan Mayor Edgardo Zaragoza a dakkel ti maaramidan ti panaglukaten ti mall ditoy tapno mapagbalin a siudad ti ilina iti masanguanan.

Segun iti mayor, iti kaaddan ti mall a kukua ti local government unit ditoy, manamnama nga umabot iti P100 million ti income ti ili a maysa a requirement iti panagbalinna a siudad.

“Kasapulan ngamin ti tallo nga agsasaruno a tawen nga nga addaan ti maysa nga ili iti P100 million income tapno maikonsidera ti panagsiudadna,” kinuna ti mayor.

Innayon ni Zaragoza nga awan ti problema iti land area ti ili ta nalablabes ngem iti 10,000 square kilometers a requirement ti kalawa ti Narvacan.

Kitkitaen metten ti LGU ditoy dagiti posible pay a pamastrekan a mabalin nga ilungalong ti ili.

“Adda pay tallo ektaria a lote a kukua ti ili a mabalin a pakaipasdekan pay iti sabali a pamastrekan,” kinuna ni Zaragoza.

Karaman ti planoda ti pannakaipatakder ti maysa nga entertainment arcade, ospital wenno kabukbukodan a water district ti Narvacan.

Kabayatanna, iti pannakailukat ti mall idi Marso 27, inkari ni Sen. Ramon “Bong” Revilla Jr. ti panangipaayna iti P5 million para iti Narvacan. #

Comments are closed.