Footer

Matmaturog, napaltogan, natay

SANTIAGO, Ilocos Sur – Napaltogan itay lawasna ti maysa a lalaki bayat ti pannaturogna iti papag iti sango ti balayda iti Sitio Alog, Dan-ar ditoy nga ili a puon ti nakatayanna.

Naideklara nga awanen ti biag ni Mario Rigor, 45, naasawaan, residente iti nasao met laeng a barangay, idi maidanon iti Candon General Hospital.

Naammuan iti inbestigasion a matmaturog ni Rigor iti papag iti sango ti balayda idi mapapati nga inasitgan ti di pay nabigbig a suspetsa ket pinaltoganna ti biktima.

Nagsagrap iti sugat ti biktima iti ulo ken tengngedna ket mapapati a kalibre 45 ti naaramat iti pammaltog.#