Footer

SALAYSAY: Ni Ilokano kas Turista iti Nakayanakanna a Lugar (Maudi a paset)

KABIGATANNA, nangarkilaak iti dyip ket nagturongkami iti Laoag. Kayat ngamin ni Maurice ti aglugan iti dyip nga adu ti dekorasionna. Simmurot ni Sanny, kasinsinko nga agtrabtrabaho iti Espania a nairana met nga agbakbakasion ditoy Vigan.

Nagpasiarkami pagbiit iti downtown ti Laoag. Tiningigtingigan ni Maurice ti nagiray a torre. Kinunana a mayarngi daytoy iti leaning tower of Pizza. Idi umalasdies, nagturongkami iti Fort Ilokandia. Dandani dua nga orasmi iti igid ti baybay. Nagmeriendakami iti maysa kadagiti naipattopattok a kalapaw iti kadaratan.

Nagsublikami iti Laoag ket nangaldawkami iti Jollibee.

“Just like McDonald’s”, nakuna ni Maurice.

Sangkataliaw dagiti tattao ni Maurice bayat ti pannanganmi. Nalabit salsaludsodenda iti nakemda no ania ti kaadda ti maysa a puraw iti panganan dagiti Pilipino. Aglalo ket nagadu ti order iti sanguananna.

Gapu ta saanmi a naibbus dagiti naorder, pinabungonmi agsipud ta saanda a nakutkuti.

Mapankami koma iti Pagudpud gapu ta agdindinamagen ti puraw a kadaratan ditoy ken dagiti beach resorts ngem dikami nagtuloy ta magipit ti oras da Maurice. Masapada nga agrubbuat no bigat nga agpa-Pangasinan.

Inyawisko ti idadagasmi iti Paoay Lake.

Nagturongkami pay iti Simbaan ti Paoay. Madlaw lattan ti kinaduogna ta nagtubuan payen dagiti mulmula ti parupa ken sikiganna.

Alas tresen idi agsublikami iti Ilocos Sur. Sumagmamano pay a simbaan ti dimmagasanmi a pakairamanan ti Sinait ken Cabugao.

Nalagip ni Daisy ti Ilokandia Museum idi nakatapogkami iti Magsingal. Dimmagaskami ngarud ditoy. Kas kadagiti sabsabali a museo, kadaanan a ramit, alikamen ken kawes dagiti nagkauna a puli ti linaonna.

Nagsalsaludsodak iti caretaker no sadino ti pakasarakan iti pagdidinnamagan a phallus ni Angalo. Impatuldo ti caretaker ti pakabirokan ken ni Apo Lucas Cortez, ti agbambantay. Nabayagen a kayatko a makita ti “mabagbagi ni Angalo” manipud nasarita kaniak ti maysa a mannurat nga addaan daytoy iti naisangsangayan a birtud.

Binirokmi ni Cortez. Sinaludsodna no apay a kayatmi a makita. Imbagak a nasarita kaniak ti maysa a gayyem iti kaadda daytoy iti ikutna. Pagyamanan ta nayat ket kinuyognakami iti yan ti “mabagbagi ni Angalo”.

Agpayso a kasla mabagbagi lattan ti lalaki ti langa ti bato. Naammuanmi nga adda kaarngi daytoy iti Indonesia. Kinuna ni Cortez nga adda pammati nga addaan daytoy iti bileg a mangited iti pertilidad kadagiti mapan agkiddaw. Kinuna ni Cortez a sangapulo a tao ti nangbagkat iti bato idi isalogda iti bantay.

Malemen idi sumangpetkami iti Vigan. Kunak no aginana ni Maurice ngem rimmuarda a tallo kada Virgie ken Rose. Naammuak laengen a napanda nagpallailang iti Plaza Burgos ken impiduada ti nagmerienda iti pagimpanadaan.

Kabigatanna, nasapa a nagrubuat da Maurice ken Virgie. Mapanda sorpresaen a bisitaen ti gayyemda nga agnaed iti Lingayen, Pangasinan.

Iti ipapanawda, dakkel ti imbatina kaniak nga adal. Adu pay gayam ti diak ammo maipapan iti disso a nakayanakak. Adu pay gayam ti masapul a sursuruek tapno maduktalak ti kinapateg ti napalabas, dagiti kadaanan nga ugali ken wagas ti panagbiag dagiti nagkauna a kaputotak a nagbalin a paset ken nangabel iti kinasiasinok kas Ilokano.

Ganggannaetak gayam iti bukodko a lugar a nakayanakak. Dayta ti kangrunaan nga adal a nasursurok iti panagbakasion da Maurice ken Virgie ditoy Ilocos.#

Comments are closed.