Footer

SALAYSAY: Siding iti baba ti mata, malas kadi?

Agpanunottay man met ita a kalgaw kadagiti positibo a banag a mangibalat kadagiti upay ken sennaay tapno agnanayon a nabunga dagiti amin a ganuattayo.

Iti daytoy a panawen ti moderno a panagbiag, adu pay la ti agbibiag iti sidong dagiti kadaanan a pammati ken kaugalian. Kas iti kaadda iti siding iti pagayusan ti lua. Malas kano daytoy. Babaluen ti babai nga addaan iti siding a kastoy.

Mabalin a kunam, kailian, apay, uso pay ‘ya dayta a pammati idi ugma ita a panawen ti komputer?

Mayatka man wenno madika, adda latta dagiti mamati itoy. Narigat nga iwagat dagiti nakaisigudan. Ngem no maminsan, adda met pagsayaatanda ta agserbida a kas timon iti nadalluyon a taaw ti biag.

Nupay kasta, agbaliw ken dumur-as ti biag. Daytoy ti gapuna a dagiti negatibo a nakaisigudan a pammati ket pagbalintayo koma ketdi a positibo. Iti daytoy a wagas, saan a mailuod wenno mailumlom iti “kasipngetan” a puon ti saan a pagdur-asan ti biagtayo.

Kas koma ti napasamak ken ni Janice. Kaarrubami daytoy idiay Pangasinan. Napintas a balasang ni Janice. Agtayag iti walo a kadapan ken walo a pulgada. Kasla natubtubay ti pammagina. Pagatsiket ti nasileng ken nakangisngisit a buokna. Nakarimrimat dagiti matana ken makaay-ayo ti wayas a kallidna iti kannigid a pingpingna. Naragsak a kasarsarita. Saan a pikon a kas kadagiti dadduma.

No agtungtungtongkami ket maikawak a kuldingen ti nalamuyot a bakrangna wenno ti makakuriente a bakrangna wenno ti makakuriente a barbonan a takiagna, sumipat met wenno kumuddot iti baballing, sika. Ayna, malipatak a saan ni kumander ken dagiti nakaikamangak no malang-abko ti sabong ti kalgaw nga agtaud kenkuana. Iti dayta nga isem ken pammagi, makulding la ketdi ti rikna ti uray asino a lalaki nga agarapaap.

Ngem addda dakkel a parikut ni Janice: awan a pulos ti agarem kenkuana. Dandanin maungpot ni Janice dagiti aldaw iti kalendario ngem awan ti agarem kenkuana.

Iti naminsan nga ummong iti purok, dinamagko kadagiti babbaro no apay a lislisianda nga armen ni Janice.

Sangsangkamaysada a nangibaga a mangibalo kano ni Janice ta adda sibibiag a sallapiding iti kannigid a mumukatanna. Kasla balatong ti kadakkel ti sidingna.

Nagsanamtekak iti dayta a naammuak. Ay, uray idi ubingak pay, pammati daytan dagiti lallakay ken babbaket a no adda siding iti pagayusan ti lua, babaluen ti babai.

Kasta met dagiti babbaro ditoy, mamatida a malas ti makaasawa ken ni Janice. Diak mababalaw dagiti babbaro. Ania ti gunggonam a mangasawa iti napintas no mataykanto met laeng iti mabiit? Apagbiit a langit, agtangadkan iti barsanga? Bay-amon nga armen ni Janice!

No dadduma, addan sa kinaagpaysona a nadaras a mabalo ti adda sidingna iti baba ti nagsulian ti matana. Kas ken ni Maribeth a kaarrubami sadiay Ilokos.

Nasapa a naasawaan ni Maribeth, agtawen la iti sweet sixteen a kuna. Kontraktor ti balay ti nakaasawa kenkuana.

Awan ti maipilaw iti asawa ni Maribeth. Dakkel ti masapulanna. Dakkel ti pinatakderna a balayda a ninamnamada a dua a pagtatarayanto ti lima nga ubbing.

Maysa nga aldaw, bayat ti panangtarabay ni Andy dagiti ubbingna iti baba ti mahalhaloblak a dua a kadsaaran a balay idi napugsat ti kawayan a pagtaktakderan ti maysa a trabahador bayat ti panagpalitadana. Naitupak iti ulo ni Andy ti kawayan ket awanen ti angesna a naidanon iti ospital.

(Maigibusto)

Comments are closed.