Footer

SARITA: Nadaraan a linnaaw (Maikalima a paset)

Nasapa a bimmangon ni Padre Cristobal. Idi ilukatna ti rikep ti tawa ti kombento, sinabat ti nabanglo nga alingasaw ti dinengdeng a nateng.

Nagbisaleg ti tianna idinto nga inapirasna ti tianna. Dumakdakkel ti buy-ongko, naitanamitimna. Kasapulanna manen ti agpagnapagna iti bigbigat. Ti rigatna ngamin, naimas ti luto ni Ina Ikka, ti asawa ni Ama Crispin a katulongna iti simbaan.

Kalpasan ti panagpellesna, nagpakusina ni Padre Cristobal. Immisem a nakalang-ab iti katuntuno a lames.

“Naimbag a bigatmo, Padre,” inkablaaw ni Ina Ikka.

“Kasta met, Manang,” insungbat ni Padre Cristobal. nakunana. Nanggaw-at iti tasa sana pinakbuan iti agburburek a kape. Nangkutsara iti bassit nga asukar sana inkiwar iti kape.

Nabang-aran ti barukongna kalpasan ti yiigupna.

“Naimas ti alingasaw ta lutlutuem, Manang.”

“Nagdengdengak man iti sabong ti karabasa ken tarong a nasagpawan iti tinuno a dalag, Padre,” nakuna ti baket.

“Naimbag man ta adda nagatangmo a dalag dita tiendaan?”

“Immay inted ni Andres itay bigat, Padre. Nawadwad kano ti nakammelanna dita karayan.”

Inaunaan nga anak da Ama Crispin ni Andres. Adda sangkapit-ing a bangkagna iti asideg ti karayan. Ditoy ti pagap-apitanna kadagiti nateng a mapan ilako ni Antonia, ti asawana, iti tiendaan iti Domingo a panaguudong dagiti adda kadagiti naseksek a purok ti Legleg. Nangipakat ni Andres iti ramana iti igid ti karayan ket maminsan makabulan a karsanna. No kalabonna, di malaon ti dakkel a timba ti makarsanna a dalag, gurami, lagdaw, kappi ken dadduma pay. Idaw-asanna latta dagiti nagannak kenkuana iti pangramananda kas ita.

“Ania ti madamag dita ruar, Manang?” sinaludsod ni Padre Cristobal. Adu ngamin ti masagsagap ti baket a damag no mapan makitienda. Kaadduanna a tsismis ngem adu dagiti gundaway a ni Ina Ikka ti pakaammuan ni Padre Cristobal kadagiti kangrunaan a topiko ken problema dagiti umili. Daytoy a kinalaingna nga umallingag iti damag ti pakaung-ungtanna no kua ken ni Ama Crispin.

“Ay, Padre, addan naipatakder… aniattayen ti naganna… wen birhaus kano…. iti Purok Bellas. Idi rabii, nagmamarangmang kano dagiti lallaki dita ta nagkikiting ken nagbaba ti putol ti bado dagiti babbai nga agserbi ket makita kano payen ti puon ti susoda ken sellangda. Ayna, nakunkunak ken ni Crispin itay bigat, dimo padpadasen ti mapan dita ta dinto dayta ti puon ti pagapaanyo nga agassawa…”

Naisardeng ni Padre Cristobal ti immigup iti kapena. No kasta, naituloy latta ti pannakaipatakder ti maysa a beerhouse iti Purok Bellas. Adda iti babaen ti Begnas ti Purok Bellas. Kas met la iti Begnas a panagtalon ti kangrunaan a pagbiagan dagiti agnaed.

“Ayna, Padre, ammom kadi dagiti bunggoy a naggiinom iti birhaus idi rabii? Dagiti trabahador iti maipatakder a penned. Grupogrupoda a bimmaba iti Purok Agyadyad ket nabarbartekda a naggawid. Adda kano pay soldado a napan nakipagragragsak. Dandanida kano nakiringgor iti maysa a grupo a taga-Patiakao. Naimbag ta adda napan nagpatrolia a polis ta dida koma ketdi nagsisinnida. Ayna, diak maawatan no apay nga impalubos ni Apo Mayor nga adda kasta a pagginoman nga apon dagiti kastakasta a babbai.”

Naapiras ni Padre Cristobal ti timidna. Damagna a maysa nga asideg a kabagian ni Mayor Aguimbag ti akinkukua iti nasao a beerhouse. Agpayso ngarud ti suspetsa ni Manang Lucia a dagiti trabahador iti maipatakder a penned ken dagiti soldado dagiti kangrunaan a puntiria a kustomer ti nasao a beerhouse!

“Idasarankayon, Padre? sinaludsod ni Ina Ikka ket natukay ti nauneg a pampanunoten ni Padre Cristobal.

“Madamdama, Nana,” kinuna ni Padre Cristobal. Liniklikanna ti masmasdaaw a mata ni Ina Ikka. Nagbuelta ket rimmuar iti konbento. Sinawar ti matana ni Ama Crispin. Nakitana daytoy nga agdaldalus iti sikigan ti konbento. Immasideg iti lakay.

“Pakiayabmo man, Tata, da Manang Lucia ta umay ditoy konbento. Adda napateg a pagsasaritaanmi. Ibagam nga ikuyogna ti petision.”

“Wen, Padre,” kinuna ni Ama Crispin.

Kalpasan ti treinta minutos, simmungad ni Manang Lucia. Adda inkuyogna a tallo a kaduana.

“Naglukat kanon ti beerhouse iti Purok Bellas,” nakuna ni Padre Cristobal. “Kumusta ti petision nga ipaspasiaryo a papirmaan?”

“Adda metten limapulo a nagpirma, Padre. Ngem adu a lumugar iti Purok Bellas ti mabuteng nga agpirma. Dida kano kayat a mapagura ni Mayor Aguimbag.”

“Kaykayatda nga agbalin a nariribuk ti lugarda ngem iti mapagurada ti mayor, kasta?”

“Adu ngamin kadakuada ti makitaltalon laeng ken ni Mayor Aguimbag,” kinuna ni Manang Maria. “Agamakda a no agpirmada, sabalinton ti pangiyawatan ni Mayor Aguimbag iti taltalonenda.”

“Ituloyyo ti agpapirma satayto mapan idatag ken ni Mayor Aguimbag. Patulodantayo pay iti kopia ti gobernador no dina ikkan iti aksion daytoy a banag,” kinuna ni Padre Cristobal.

“Wen, Padre,” kinuna ni Manang Lucia. “Riribuk laeng ti ited dayta a beerhouse kadagiti kalugarantayo. Agasem, damagko a dandani nagriringgor ti grupo dagiti trabahador ken dagiti taga-Patiakao idi rabii.”

(Adda tuloyna)

Comments are closed.