Footer

Tabako, saanen a sunset industry: NTA official

TABAKO. Madama ti panagbunag dagitoy dua a mannalon iti ginatudda a bulong ti tabako iti talonda iti Sitio Amguid, Candon City tapno maipugonda. (Leoncio Balbin, Jr.)

TABAKO. Madama ti panagbunag dagitoy dua a mannalon iti ginatudda a bulong ti tabako iti talonda iti Sitio Amguid, Candon City tapno maipugonda. (Leoncio Balbin, Jr.)

CANDON CITY – Saanen a sunset industry ti tabako ditoy probinsia, segun iti maysa a nangato nga opisial ti National Tobacco Administration ditoy siudad.

Kinuna ni Estrella G. de Peralta, NTA OIC Branch Manager ditoy siudad, nga immadu ti nagmula a mannalon ita a tawen gapu ta manamnama a napintas ti presio ti tabako ita a tawen kas idi napalabas a panagtatabako.

Kinuna ni Tata Insiong, 54, taga-Narvacan, a naay-ayo a nagmula gapu ta adu ti naganansia dagiti padana a mannalon a nagtabako idi napan a tawen.

Segun ken ni Mang Ipe, 35, pimmintas ti presio ti tabako gapu iti pannakaingato ti floor price ti tabako babaen ti panangilungalong da Gov. Deogracias Victor Savellano ken ni Cong. Eric Singson.

Idi Oktubre 16, 2007, naangay ti maysa a tobacco summit babaen ti initiatibo ni Savellano a tinabunuan dagiti mannalon iti probinsia ken dagiti opisial dagiti gunglo dagiti agmulmula iti tabako no sadino nga indatag dagiti tobacco farmers dagiti problemada kangrunaan iti nababa a presio ti produktoda a tabako iti baet a dumakdakkel ti mabusbosda iti ganagan ken pestisidio.

Segun ken ni Savellano, naduktalanna bayat ti ibibisitada iti Hunan, China a P200 kada kilo ti presio ti Grade A a tabako ken P100 kada kilo ti reject idinto a P55 laeng kada kilo ti panaggatang dagiti traders iti Grade A a tabako.

Kinumpirmaran ni Cong. Eric Singson nga uray iti Malaysia, P200 kada kilo ti presio ti tabako.

Iti tripartite miting a naangay sakbay ti panaggibus ti 2007, immannugot dagiti agparpartuat iti sigarilio ken traders a maingato ti floor price ti tabako iti P10 kada kilo ti Grade AA idinto a P9.50 kadagiti nababbaba a grado.

Kinuna ni de Peralta a nasurok a 600 nga ektaria ti ngimmatuan ti namulaan iti tabako iti maikadua a distrito iti daytoy a tawen maikumpara idi 2008

Kinuna ni de Peralta nga idi napan a tawen, aganay 6,982 nga ektaria ti namulaan iti tabako iti 21 a munisipalidad ken maysa a siudad iti maikadua a distrito ti Ilocos Sur, ngem iti pay laeng bulan ti Pebrero iti daytoy a tawen, immaboten iti 7,626 nga ektaria ti namulaan iti tabako, wenno nangatngato iti 644 nga ektaria.

“Gapu iti kinasayaat ti presio ita a tawen, adu pay ti nagikamakam a nagmula iti tabako, ” kinuna ni de Peralta.

Segun ken ni de Peralta, agdagup iti 8,963 a mannalon ti nagmula ita a tawen iti segundo distrito, ad-adu iti 377 iti 8,586 a nagmula idi 2008 ket manam-nama a maartapan ti nasurok 12 milion a kilo a produksion idi 2008.

Aganay a 45 porsiento ti produksion a tabako ti aggapgapu iti maikadua a distrito ti probinsia.

Kinuna ni de Peralta a kadakkelan ti produksion ti Candon City ket limmawa iti 223 nga ektaria ti namulaan ditoy iti tabako. Simmaruno a kadakkelan ti Narvacan, sa ti Galimuyod, Burgos ken Santa Lucia, Tagudin, Cervantes ken Alilem.

Impakaammo ti NTA official nga umab-abot iti manipud P70-80 ti presio ti tabako ita a tawen gapu ta simmayaat ti kalidad dagiti naluto a bulong.

Kadagiti napalabas a tawen, dandani narpuog ti industria ti tabako gapu iti nababa a kalidad dagiti bulong a pinataud ti naapgad a daga, nasapa a panagtutudona ken nababa a presio.

“Saanen a sunset industry ti industria ti tabako,” kinuna ni de Peralta.#

Comments are closed.