Footer

EDITORIAL: Bimmaba ti kalidad dagiti pagadalan iti abogasia?

Itay nabiit, rimmuar ti resulta ti Bar exam para kadagiti nagturpos iti abogasia ditoy pagilian. Nababbaba manen ti passing rate ita a tawen ngem idi 2007.

Segun iti rekord ti Korte Suprema, kadagiti 6,364 a nageksamen idi Setiembre idi napan a tawen, agdagup laeng iti 1,310 dagiti nakaruar wenno 20.58% laeng. Idi 2002 a kababaan ti passing rate iti daytoy a dekada, manipud iti 4,659 a nageksamen, 917 laeng dagiti nakaruar wenno 19.68%.

Kas maibatay pay iti rekord ti Korte Suprema, idi 2000, agdagup laeng iti 979 ti nakapasa manipud iti 6,187 a nageksamen wenno 20.84%; idi 2003, agdagup laeng iti 1,108 ti nakapasa manipud iti 5,349 nga examinees wenno 20.71%; idi 2007, manipud iti 5,626 a nageksamen, 1,289 laeng dagiti nakapasa wenno 22.91%.

Iti las-ud ti siam a tawen manipud idi 2000, idi  2001 a 32.89% ti passing rate ta 1,266 ti nakaruar manipud iti 3,849 examinees; idi 2004, 31.61% ti passing rate ta agdagup iti 1,659 ti nakaruar manipud iti 5,249 nga examinees; ken idi 2006, 30.60% ti passing rate ta agdagup iti 1,893 ti nakaruar manipud iti 6,187 a nageksamen.

Ita, ti saludsod: apay a nagbaba ti resulta ti tinawen nga eksamen para kadagiti nagturpos iti abogasia?

Kadagiti nageksamen a nagsaludsodanmi, maymaysa ti sungbatda:  narigat ti eksamen ket adu dagiti saludsod a pagduaduaanda ti umisu a sungbatda.

Kas maarisit iti sungbat dagiti napagsaludsodanmi, natinnagda agsipud ta nangato unay para kadakuada dagiti naited iti eksamen a sungbatanda.

Ngem narigat a maawat a daytoy ti kagagapu a bassit (bimmassit) ti bilang dagiti nageksamen a nakaruar. Ta saan nga asi-asi dagiti propesorda iti Law, napili dagitoy manipud kadagiti mamasirib nga abogado a raraemen ken tangtangaden dagiti kabaddungalanda iti propesion.

Wenno pudno ti suspetsami a half-baked ti kaadduan dagiti nagturpos agsipud ta diploma mills dagiti nagbasaanda a kolehio ken unibersidad?

Kaniami, nababa ti resulta ti nakaruar iti eksamen gapu ta bimmaba ti kalidad ti edukasion ditoy pagilian gapu ta saan a napigsa ti pondasion ti edukasion ken iti panagraira dagiti nababa ti kalidadda a pagadalan.

Saan a malibak a dakkel ti pagkunaan wenno pagkamtudan dagiti agturpos iti elementaria ken sekundaria. Kinapudnona, adu dagiti sumrek iti kolehio a narigatda pay ti makasao iti nalinteg ken simple nga Ingles wenno agsurat iti simple nga essay. Sumangkautro, no simrekda iti nababa ti standardda a pagadalan, ania ti manamnama kadakuada nga agturpos?

Maysa nga am-ammomi a hues ti nangegmi a nagsennaay nga ad-adda a nagsakit ti ulona ta nagsasanggala kano ti alupasi ken nambaan iti pinaaramidna a brief.

Kasta kagrabe ti produkto dagiti kolehio ken unibersidad tattan?

Adu la ketdi ti masaktan iti daytoy a pammaliiw ngem adda kadi maitudo a sabali a rason no apay a nababa ti bilang dagiti makaruar iti tinawen nga eksamen para iti kinaabogado#.

Comments are closed.