Footer

OPINION: Kinapudno iti Serbisio (Umuna a paset)

Masarakan iti Article XI, Section 1 ti Pagalagadan-Linteg wenno Konstitusion ti sumaganad:

Accountability of Public Officials

“Public office is a public trust. Public officers and employees must at all times be accountable to the people, serve them with utmost responsibility, integrity, loyalty and efficiency. Act with patriotism and justice and lead modest lives.”

Kayatna a sawen, maysa a talek ti  serbisio publiko. Ngarud, masapul nga iti amin a kanito ken gundaway,  kasapulan a sungbatan amin nga opisial ken empleado ti publiko  kadagiti tattao ti gapuananda, agserbida a sireresponsable, sipupudno ken iti amin a kabaelanda. Agtrabahoda a napnuan panagayat iti pagilian ken napnuan hustisia ken kasta met nga agbiagda a saan a naparammag.

Ammotayo amin a naikumit  iti gobierno ken iti amin a mangmangged iti publiko daytoy nga allagaden. Saan koma a pagindidiammoan dagiti agtuturay ken dagiti agtrabtrabaho iti gobierno daytoy a commitmentda iti publiko kas nailanad iti Konstitusion. Saan a nakappapati a saantayo nga ammo dagitoy,  nangruna dagiti agtuturay ken dagiti agserserbi iti gobierno, agsipud ta naipaawat a nasayaat kadatayo dagiti linaon ti Pagalagadan-Linteg sakbay nga inaprobaran ken inawattayo a  pangibatayantayo iti kabibiagtayo nga umili.

Ngem ladingitek a sawen nga adu nga agserserbi iti publiko ti saan a mangsursurot  iti  daytoy nga allagaden. Nakaladladingit nga iti baet  nga adda daytoy allagaden a suroten ken  agbalin a tarabayda, adu nga agtuturay ken empleado  ti gobierno ti nagbalin nga iresponsable ken nanggundaway iti talek a naikomit kadakuada.

Mangdakamattayo kadagiti panagabuso dagiti agtuturay a no mangibanbando nga “adipenda ti publiko” ken dagiti empleado ti turay a maibagbaga a “agserbida a naimpusuan ken iti amin a kabaelanda”.

Kitaentayo dagitoy:

Adda dagiti sumrek a nakaladladaw iti opisina sa aggawid a nakasapsapa ngem  pagparangenda a simrek ken nagawidda iti husto nga oras iti daily time recordda. Adda met dagitay sumrek nga agpayso iti umno nga oras ngem dida pay mapudotan ti tugawda no ar-arigen, rummuardan ket sadanto laengen agsubli no ngannganin panaggawidan ket no “naisaguden” iti napananna, uray anniniwanna, saanen a makita pay.  Adda met dagitay “agopisina” idiay balayda ta pagparangenda iti time record a simrekda a nagtrabaho iti dayta nga aldaw idinto nga agkubkubukobda iti balayda. Adda pay dagitay rummuar iti opisinada “on official business”  ngem mapanda gayam aglako kadagiti tagilakoda wenno agsingir kadagiti pautangda wenno mapan “agkarawa iti tulang”. Adda pay dagitay nakaiskediul a mapanda agbisita iti maysa a lugar ngem dida met nagparang ta sabali met ti naturongda. Ti nasakit, kas nakairuaman, nagsagana ni Filipino, ket iti saan a panagparang ti sangaili nga agtuturay wenno opisial uray apagbiit laeng koma, nadadael laeng ti sagana ken  nagbalin nga awan kaes-eskan ti ninamnama a tulong nga aggapu koma iti sangaili.

Adu pay dagiti sumsumrek kadagiti opisinada, saan a tapno agtrabaho no di tapno agbulakbol wenno agsusugal. Isu a saan a karkarna nga iti malem, awan ti matagtagitao kadagiti opisina, nangruna dagiti lallaki.  No adda umasideg nga agpatulong, kakaasi ti clerk a mapan mangbirok no sadinota a linged ti yanda tapno saan a makita ti panagpipiningpiningda.  Ti rigatna, no mairana a maab-abak ti sinalbag, makaunget a sumango iti pobre nga agkasapulan, wenno agsubli ti clerk a mangibaga nga adda gayam iti “field” ti masapul ti agpatulong. Ania pay, agaludaid piman ni umili nga aggawid nga ima-ima ket kapilitan nga agsublinto manen iti sabali nga aldaw. Sayang laeng ti kuarta ken taktakna idinto a aglalabbet ti simron ken pannakadismayana iti klase ti serbisio iti opisina a pagkasapulanna iti tulong.

(Adda tuloyna)

Comments are closed.