Footer

Panagungar Festival, nairusat tapno maidur-as ti turismo, OTOP

STA. MARIA, Ilocos Sur –  Tapno maidur-as daytoy nga ili a kas pilgrimage ken eco-tourism destination ken maitandudo dagiti produkto daytoy nga ili, naisayangkat ditoy ti Panagungar Festival itay Abril 12.

Kinuna ni Konsehal Henry Cabatu, presidente iti tourism council ditoy ken akin-initiatibo iti daytoy a parambak, naisayangkat ti Panagungar Festival kas pangitampok iti selebrasion ti resureksion wenno panagungar ni Hesukristo kalpasan ti ipapatayna iti krus.

Kinuna ni Cabatu a napanunotanda daytoy a kita ti festival tapno maparnuay ti maysa a parambak a mangitandudo iti identidad daytoy nga ili a nakalista a maysa kadagiti world heritage a lugar.

Karaman kadagiti tampok nga aktibidad ti street dancing a nakipartisiparan dagiti estudiante dagiti nadumaduma a sekundaria ditoy nga ili a pakairamanan ti St. Mary’s College, Sta. Maria National High School, ken the Ag-agrao National High School.

Nairaman ti simbaan ni Nuestra Senora de la Asuncion church a naipatakder iti tuktok ti maysa a turod ditoy a kas maysa kadagiti uppat a baroque a simbaan iti pagilian a nailista a kas world heritage site.

Kas ti simbaan ditoy, nakalista ti Vigan a kas heritage city gapu kadagiti kadaanan a pagtaengan ditoy a naipatakder pay idi tiempo dagiti Kastila.

Kinuna ti konsehal a naisayangkat ti parambak kas panangital-o  saan laeng iti turismo no di pay iti one town one product (OTOP) ti ilida nga unas a pakapartuatan iti suka, balikutsa ken sinambong.#

Comments are closed.