Footer

SALAYSAY: Ballaag iti Nasinged a Langenlangen (Umuna a paset)

Maysa a sensitibo a paset ti biag ti pamilia ti langenlangen ti nagannak ken ti anakda. Masansan ngamin a marakrak ti pagtaengan gapu iti saan a panagkikinnaawatan iti nagbaetan ti ama wenno ina ken dagiti annakda. Adda dagiti nagannak a makarikna iti pannakapaay wenno di pannakapnek gapu iti dida namnamaen a saan a nasayaat a pannakilangen kadakuada dagiti annakda. Kadagitoy a nagannak, dakkel a biddut iti biang dagiti annakda ti saanda a panangipirpirit iti kapampanunotan, kaugalian ken nakairuamanda nga isu ti inallawat ken sinurotda manipud kadagiti nagannak kadakuada.

Gapu iti saan a panagkatunosan ti nagannak ken dagiti annakda gapu iti agsupadi a kaugalian, kapanunotan ken pammati, maparnuay ti risiris iti nagbabaetanda a masansan nga agtungpal iti pannakarakrak iti napintas a panaglalangenda.

Ngem saan a maamiris dagiti dadduma a nagannak a mabalin met a maitudo ti pammabasol kadakuada iti pannakapekka wenno pannakapugsat ti nasayaat a langenlangenda kadagiti annakda.

Maysa kadagiti kadawyan a biddut dagiti nagannak ti panangipakatda kadagiti annakda dagiti pagannurotan, pagayatan ken pammatida kadagiti annakda. Mabalin nga ikalinteganda a dagitoy ti napuotanda nga impakat dagiti nagannak kadakuada ket  nagbalinda met a nasayaat nga umili ken nagannak. Mabalin nga inayonda a no nagsayaatanda dagitoy nga impakat kadagiti nagannak kadakuada, apay ngarud a saanen a maikanatad wenno maiyannatup a maipakat kadagiti annakda ken dagiti annakto dagitoy iti masakbayan?

Agpayso, idi tiempo ti kinaubingda, mabalin a dagitoy a sursuro ken kaugalian ket epektibo nga instrumento nga inaramat dagiti nagannakda a nangpatanor kadakuada a kas responsable ken managbuteng iti Dios nga umili ngem rumbeng laeng a maamirisda a mabalin a saanen nga aplikante daytoy a konsepto kadagiti ubbing iti agdama a henerasion. Sabali ti aglawlaw idi isuda ti ubbing, sabalin ti aglawlaw a paggargarawan itan dagiti annakda. Dumakdakkel dagiti annakda iti aglawlaw a naan-anay a maisupadi iti aglawlaw a nakapatanoranda idi.

Kitaentayo dagiti sumaganad: Idi tawen 1940s ken 1950s, napatanor dagiti ubbing nga agtungpal kadagiti nagannak kadakuada. No ania ti ibaga dagiti nagannak kadakuada, agtungpal dagiti ubbing. Ngamin, iti uneg ti pagtaengan, linteg ti balikas dagiti nagannak ket kasapulan a tungpalen dagiti annak uray no adda dagiti saludsod nga agam-ampayag iti panunotda wenno adda reserbasionda.

Kas iti kaso ni Ben, anak ti abogado ken abogada. Masirib ni Ben. Idi agturpos iti elementaria ken sekundaria, isu ti balediktorian. Idi sumrek iti kolehio, kayat ni Ben ti agadal iti kinapintor. Daytoy ngamin ti pagesmanna. Idi agbasbasa iti sekundaria, nangab-abak kadagiti pasalip iti poster making ken painting. Ngem sabali ti arapaap dadakkelna. Kayatda a sumurot ni Ben iti tugotda a nagballigi iti abogasia a propesionda.

Kas natulnog nga anak, kapilitan a nagenrol ni Ben iti abogasia nupay sumkad ti riknana.

Impaspasindayag ti amana nga agbalinto a nalatak nga abogado ni Ben gapu iti kinasariritna. Ngem anian a pannakaupayna idi makitana dagiti nababa a grado daytoy kadagiti asignaturana.

Pinagsardeng ti ama ti anak nga agbasa. Saannan nga intaltalek uray masansanen a maladaw daytoy a sumangpet iti balayda iti rabii. Nagbalin a natamnay ti langenlangen ti ama ken ina ken ti anak.

Limed kadakuada, nagbirok ni Ben iti trabahona. Nakastrek a para bagkat iti tagilako iti maysa a supermarket. Idi makaurnong, nag-enrol iti Fine Arts. Rabii ti panagbasana.

Kalpasan ti innem a tawen a panagsakripisiona, nagturpos met laeng ni Ben iti kinapintor. Idi nagraduar, saanna nga impakaammo kadagiti dadakkelna  agsipud ta ammona a dida met la dumar-ay.

Nakisalip ni Ben iti kontes ti panagpinta nga insayangkat ti maysa a nalatak a kompania. Inyalatna ti pammadayaw. Imbalatna pay dagiti addan naganna a pintor iti pagilian. Kagudua ti milion ti inabakna a gunggona, malaksid laeng ti plake ti pammadayaw.

Manen, dina impakaammo kadagiti dadakkelna.

Nadanon ti rabii a pannakapadayawna. Idi awatenna ti premiona, nakitana ti ama ken inana iti tallaong, nakarungrungbo ti isemda ken agpaypayapayda. Daytoyen ti karagsakan a rabii iti biag ni Ben. Iti idadar-ay dagiti dadakkelna, ammonan nga inawat dagitoy ti biddutda ken agsubli met laengen ti napintas a langenlangenda a sangapamilia.

Nagasat ni Ben ta intakderna ti bukodna a pammati ken kalintegan. Ngem kasanon dagiti dadduma nga annak a saan lattan a nagtimek ket binay-anda a ti kayat dagiti dadakkelda ti matungpal uray iti baet ti naulimek nga isusupringda?

(Adda tuloyna)

Comments are closed.