Footer

SALAYSAY: Siding iti baba ti mata, malas kadi? (Maudi iti dua a paset)

Gapu ta napintas ken kalaslasbanganna ta di pay naganak, adu ti nagarem ken ni Maribeth. Ni Doktor Mario ti napilina. En grande ti kasarda.

Ngem uppat a bulan kalpasanna, naikras ti kotse ni Doktor Mario a puon ti nakatayanna.

Segun iti inbestigasion, napukaw ti preno ti kotsena isu a naidungpar ti luganna iti kabiti a waiting shed iti igid ti dalan.

Ngem adu kadagiti kalugaranda ti namati a malas ti maasawa ni Maribeth gapu iti siding iti baba ti kanawan a matana. Nagikay dagiti babbaro kenkuana.

Sabali pay ti estoria ti maysa a gayyemko mainaig ken ni Lily, 20, nga adayon a kabagianna.

Adda met siding iti babaen ti kannigid a matana.

Kuna ti gayyemko nga idi agtawen ni Lily iti 19, nagtarayda iti nobiona. Nagluganda iti bus nga agpa-Manila.

Dinungpar kano ti bus ti maysa nga akasia. Segun iti drayber, nagtuglep gapu iti puyatna ket naladawen idi madlawna a sabalin ti turong ti lugan.

Iti dayta nga insidente, natay ti nobio ni Lily idinto a nakalasat amin a pasahero nupay adda dagiti grabe a nasugatan.

Iti biang ti gayyemko, ti siding ni Lily ti puon ti nasapa nga ipupusay ti nobiona. Talaga kano a babaluen ni Lily.

Ngem no siak a biang, linoloko laeng dayta a pammati. Kaniak, no nayuged a matayka, uray addaka iti uneg ti balaymo, matayka latta. Mabalin a malittokanka iti naiwawa a bala a nanglussok iti sim nga atep. Mabalin a mabangungotka iti pannaturogmo. Mabalin met a maikagliska iti banio ket maitupa ti ulom iti baldosa.

Kastay kunadan, kasla mannanakaw ni patay a sumippayot iti uray ania nga oras.

Ngem ituloytayo daytoy estoriatayo ken ni Janice a nagproblema iti kaawan ti agarem kenkuana iti baet nga adda met pamuyaanna.

Maysa nga aldaw, binisitanak ni Janice.

Ad-adda a pimmintas iti panagkitak iti nakipet a puraw a tisirtna ken maong a pantalonna a kimmepkep iti nasabang a patongna. Inyunegna iti uneg ti estasion ti ayamuom ti rosal a dinigos ti umuna a tudo iti kaldgaw.

Dandani la makatosak ni Ampeng a dianitor ta uray la kimmaro ti piwisna a mangtaldiataldiap ken ni Janice.

Nagpasig ni Janice a tulongak maipapan iti problemana: ti siding iti baba ti matana a kasla lunod a mamagikay kadagiti babbaro nga agarem kenkuana. Ania kano ti aramidenna?

“Nalaka laeng dayta,” nakunak. “Saan a nadagsen a problema dayta.”

“Kasano?” nagrukob pay a nangiyasideg iti rupana kaniak. Ay sus,  kailian, ad-addan ti piwis ni Ampeng nga umar-arubayan a nakasirpat iti puon ti nabaknang a singin a bantay.

“No aniaman ti parikutmo, dimo baklayen,” imballakadko.  “Ibbatam wenno ikkatem no kimpet kenka.”

Saan nga orihinal nga ideak daytoy. Nabasak laeng iti libro. Ngem nangited kaniak iti napintas nga idea tapno mapukaw ti problema ni Janice.

“Talaga a mapagtalkanka!” naarakupnak pay ni Janice iti ragsakna. “Apay a diak napanunot dayta idi pay laeng?”

Tinungpal ni Janice ti ballakadko. Pinaikkatna ti sidingna. Idi malpas ti operasion, nagpukawen ti siding. Awan pakailasinan a naikkat.

Ngem kalpasan ti dua a bulan, ni met Nanangna ti immasideg kaniak ta adda kano parikutna. Makasuron pay a nangibaga a nakaang-angsegen ti paraanganda iti kaadu dagiti babbaro a mapan agtapat ken umarog iti balasangna.

“Simple ti solusionna tapno agsardengen dagiti babbaro nga umarog ken ni Janice,” nakunak. “Mangpilin iti maysa kadakuada tapno maitudingen ti panagkallaysada.

Immisem ti Nanang ni Janice. “Dayta nga agpayso ti aramidek,” kinunana.

Ngem kalpasan ti makabulan, siak metten ti nagproblema. Siak kano ti best woman iti kasar ni Janice. Nagproblemaak iti isuotko ta .

Naglabas dagiti tawen. Naragsak ti pamilia a binangon da Janice ken ti asawana.

Ita, nadamagko nga adda sumagmamano a babbalasang iti lugarda nga adda sallapiding iti baba ti matada ti nagpaopera tapno mapukawen daytoy “nadagsen a krus” iti biagda.

Siding iti babaen ti mata, malas kadi, kailian? Well, pudno man wenno saan, adda kenkan no mamatika.#

Comments are closed.