Footer

BANNER NEWS: Vigan mayor, naikkan otorisasion a sumrek iti MOA para pannakapasayaat ti Vigan airport

VIGAN CITY – Tapno ad-adu pay ti maawis a commercial airlines nga agbiahe ditoy siudad, maysa a resolusion ti impasa ti sangguniang panlungsod itay nabiit para iti pannakaited iti otorisasion ken ni Mayor Eva Marie S. Medina a sumrek iti katulagan iti Department of Transportation and Communications para iti pannakaala kadagiti daga agraman pannakapasayaatda para iti proyekto ti eropuerto iti Barangay Mindoro ditoy siudad.

Inaprobaran ti konseho ditoy ti resolusion nga indatag ni Konsehal Hermenigildo Apelin a mangited iti otorisasion ken ni Mayor Eva Marie S. Medina para iti iseserrekna iti maysa a memorandum of agreement iti DOTC nga ibagian ni Undersecretary Doroteo A. Reyes Sr. para iti pannakagatang dagiti daga ken pannakapasayaatda para iti Vigan Airport Development Project ditoy.

Segun iti resolusion, adda pondo iti babaen ti DOTC CY 2008 Infrastructure Program ti General Appropriations Act ti SARO BMB-A-08-0003725 nga agdagup iti P130 milion para iti konstruksion ti Vigan Airport Development Project iti siudad ditoy.

Agdagup iti P4.5 milion ti nailatang para iti acquisition ti daga para iti nasao a proyekto a pangpasayaat iti nasao nga eropuerto.

Segun ken ni Apelin, nasayaat ti lokasion ti eropuerto ket serbian ti naisingasing a proyekto dagiti kasapulan ti rehion, nangruna daytoy a siudad.

Iti agdama, ti pay laeng Inter- Islands Airlines ti commercial airline nga agbibiahe ditoy siudad.

Agrubbuat ti 60-seater nga eroplano iti malem ti Huebes ken Domingo manipud Manila nga agpa-Vigan City ket agsubli iti Manila iti kabigatanna.

Para iti one-way ticket, P3,450 ti plete idinto a P6,900 ti round trip ticket.

Nangilatang ti gobierno probinsial iti P1.6 milion para iti 30 guaranteed seats nga alaen ti probinsia tapno maguyugoyna ti nasao nga airline a manglukat iti rotana ditoy Vigan.

Kinuna ni Vice Mayor Franz Ranches nga iti pannakaipasa ti nasao a resolusion, ad-adu pay a commercial airlines ti maawis nga agbiahe ditoy siudad.#

Comments are closed.