Footer

MAREGMEG TI BALITOK: Sulisog

Salmo 1:1, 139:12-14

Mateo 26:41

1 Corinto 10:12-24

Filipos 4:8

Kasano ti agsurat iti napintas a sarita – tay para salip? Ania ti rikna ti mangabak iti umuna gunggona iti salip iti sarita? Pagpidutan kadagiti napipintas a tema ti suraten a sarita?

Dagitoy dagiti saludsod a masansan a maipuruak kaniak kadagiti ummong, lalo kadagiti agdadamo a mannurat wenno dagiti agar-arapaap met a mangabak iti panagsuratan iti sarita.

Nadakamat iti naminsan ti pinangabak ti saritak nga “Iti Baet ti Sipnget ken Lawag” iti umuna a gunggona iti COVLLA 1998. No makaawatka iti simbolismo, maawatamon a maipapan daytoy iti sulisog a kas iparangarang ti paulo ti sarita.

Supply and property management manager ni Eugenio Pader iti maysa a dakkel a mining corporation iti Benguet. Sulsulisogen ti maysa nga Intsik a kontraktor babaen ti panangitedna iti half million pesos tapno isu ti makaala iti dayta a kontrata. Manipud sardam agingga iti simmingising ti init a pinampanunot ni E. Pader ti umno nga aramidenna. Di nairuam iti graft and corruption ta nagun-odna ti takemna babaen ti panangrugina iti nababa a puesto ken ti panagtalek ti korporasion iti kabaelanna.

Nasken nga addaan ti maysa a sarita iti tema a naibasar iti sound foundation wenno nasiken a pagibatayan kadagiti maabel a pasamak. No awan daytoy, palawapaw ti sarita. Kas met las iti biag, no awan ti nasiken a pagibatayan kadagiti pangngeddeng ken aramiden, agbalin a palawapaw ti biag ket awan ti kaes-eskanna.

Iti sarita, (kinapudnona, maysa daytoy a mini-sarita wenno vignette), ti Intsik ti sulisog agsipud iti diayana a dakes wenno di umno nga aramid, nga isu ti parikut a nasken a solbaren ni E. Pader. Ngem kuna ti Salmo 1:1: “Nagasat ti tao a di mangipangag iti pammagbaga dagiti managdakdakes, a di mangtulad iti aramid dagiti managbasol ken di makikappeng kadagiti mangrabrabak iti Dios.”

Iti panagpampanunot ni E. Pader nga agpatnag, nagbatay manen iti “Usigennak, O Dios ket ammuem ti adda iti pusok. Suotennak tapno makitam ti adda iti panunotko. Wen, sukimatennak no adda kinaulbod kaniak, ket iturongnak iti dalan nga agnanayon.” (Salmo 139:23-24). Adtoy pay, “Agpuot ket agkararagkayo tapno saankayo a matnag iti sulisog.” (Mateo 26:41)

No awaten ni Pader ti diaya, mabayadannan ti nabayagen a tintinnaganna a house and lot, matulonganna ti kabsatna nga agabrod ken mabalin nga adda pay maidulinna para iti panagiskuela dagiti annakna. Kinatalged ti kayat nga iparang ti ngednged (restraint) iti sarita. “Siasinoman a mangipagarup a natalged ti panagtakderna, agannad koma amangan no matuang. Tunggal sulisog nga umay kadakayo, gagangay a dumteng iti tao. Ngem tungpalen ti Dios ti karina, ket dina ipalubos a masulisogkayo iti diyo kabaelan a sarangten. No masulisogkayo, ikkannakayo iti pigsa a mangibtur ket iti kasta makalisikayo (1 Cor 10:12-13).

Pinaay ni E. Pader ti awis. Saan a nakaaramid iti dakes. Di namulitan ti naganna. “Kakabsatko, agpanunotkayo kadagiti banag a naimbag ken maikari a raemen: dagiti napudno, natakneng, nalinteg, nadalus, napintas ken nadayaw.” (Filipos 4:8).

Naggibus ti napintas a pakasaritaan ni Eugenio Pader. Napintas ti sarita ta nangabak iti umuna a gunggona. Napintas ta addaan iti nasiken a nagbatayan dagiti pasamak.

Dagiti agbibiag iti maysa a sarita ket kapadana met laeng dagiti tao iti pudno a biag. No ampaw ti agbibiag iti sarita, ampaw ti sarita. No ampaw ti biag ti maysa a tao, ampaw ti panagbiagna, awan naimbag a turongen ket di nasayaat a pagsarmingan. Ti panagbiag ket kasla agar-aramid iti maysa a sarita. No nasayaat ti panagbiag, nasayaat ti maabel a pasamak iti partuaten a sarita – iti sarita ti biag.#

Comments are closed.