Footer

Mayor, binetona ordinansa a mangted cash incentive 3-term officials

STO. DOMINGO, Ilocos Sur – Imbeto ti mayor ti impasa ti konseho ditoy nga ordinansa a mangited iti incentive award kadagiti nabutosan nga agtuturay a makaturpos iti nagsasaganad a tallo a termino.

Iti panangbetona iti nasao nga ordinansa, kinuna ni Mayor Floro “Butch” Tadena a saan a mayataday a pirmaanna daytoy agsipud ta isuda a nakatugaw ti mabenepisiaran iti incentive award.

Kinuna ti mayor a maibilang a self-serving ti maited nga insentibo kadagiti agtuturay a makaturpos iti tallo a nagsasaganad a termino ket dina kanunongan ti nasao nga ordinansa.

Itay nabiit, inaprobaran ti konseho ditoy ti ordinansa a mangited iti incentive award kadagiti nabutosan nga agtuturay ditoy nga ili a makaturpos iti tallo nga agsasaganad a termino.

Sagudayen ti nasao nga ordinansa a maikkan iti incentive award ti mayor, bise mayor, konsehal, SK Federated President ken ABC Federated President nga agturpos iti tallo nga agsasaganad a termino.

Umawat ti agturpos a mayor iti P300,000, ti bise mayor iti P250,000, ken sag-P200,000 dagiti konsehal, SK ken ABC Federated President.

Nagdalan iti nabara a diskusion daytoy nga ordinansa nga inesponsoran ni Konsehal Henry Palpallatoc agsipud iti panirigan ti sumagmamano a konsehal a self-serving daytoy gapu ta isuda a nakatugaw ti mangaprobar ken mabenepisiaran iti incentive award.

Kinontra ni Konsehal Michael Figueras ti nasao nga ordinansa idinto a kinunana a “nakababain ta self-serving” daytoy gapu ta isuda a nakatugaw ti mangaprobar ken isuda ti mabenepisiaran.

Kinuna met ni Konsehal Tom de Vera a nupay awan ti problema iti legalidad ti benepisio “ngem self-serving latta” ti nasao a gandat agsipud ta isuda a nakatugaw ti mabenepisiaran.

Kinuna ti konsehal nga adu ti gumawgawawa a proyekto ket dagitoy laeng koman ti pakaipaayan ti pondo.

Ngem iti naisayangkat a panagbubutos, pito a konsehal ti nangpabor, 2 ti kimmontra idinto a maysa ti nag-abstain. Da laeng Figueras ken de Vera ti nagbutos a kimmontra.

Maipalagip nga itay nabiit, inaprobaran ti sangguniang panlalawigan ti ordinansa nga indatag ni Board member Chuchi Purisima a mangipaay iti cash incentive kadagiti opisial ti probinsia a nagturpos iti tallo nga agsasaganad a termino.

Umawat ti gobernador ken ti bise gobernador iti sag-P1 million ken dagiti board members iti sag-P700,000.

Ngem naglak-am ti bokala iti pammabalaw gapu iti daytoy nga indatagna nga ordinansa.

Addan iti maikatlo a termino ni Purisima ket maysa kadagiti mabenepisiaran iti nasao nga ordinansa no agbalin daytoy a linteg.

Kinuna ti bokala nga inadaptarda laeng ti inaramid ti Vigan City ken Candon City a nangipasa iti ordinansa a mangited iti cash incentive kadagiti city officials a nagturpos iti tallo nga agsasaganad a termino.#

Comments are closed.