Footer

Medical missions, saan a panagsagana iti nangatngato a posision: bise gobernador

CANDON CITY – Kinuna ni Bise Gobernador Jeremias “Jerry” Singson a saan a panagsaganana a tumaray iti nangatngato a posision dagiti agsasaruno a medical missions nga isaysayangkatda.

“Pudno a kayattayo met ti tumaray iti nangatngato a puesto ngem dagitoy isaysayangkattayo a programa ket awan ti laokna a politika. Daytoy ti wagastayo a tumulong kadagiti awanan,” inlawlawag ni Singson.

Maysa a siudad ken tallo nga upland municipalities ti nakaisayangkatan iti uppat nga aldaw a major/minor surgical mission, medical ken dental missions a naangay itay Abril 13-16.

Segun ken ni Singson, karaman kadagiti naisayangkat nga operasion ti pannakaikkat ti luslos, katarata, myoma, bukol iti barukong, bato, gusing ken daduma pay.

Kinuna ti bise gobernador a nagbuligan ti Ohio Medical Team nga indauluan ni Dr. Richard Paat ken ti UST Medical Team nga indauluan ni Dr. Jose Mercado ti nasao a mission babaen ti pannakikammayyet ti Joint Community Service (JCS).

Nasurok a 400 dagiti nataming iti major operations a naggapu iti nadumaduma nga ili ti probinsia.

Naisayangkat pay ti umasping a medical mission kadagiti ili ti Galimuyod, San Emilio ken Lidlidda.

Iti pannakairugi ti medical mission ditoy siudad idi Abril 13, kinuna ni Bise Gob. Jerry Singson a paset daytoy ti programana para iti salun-at dagiti kaprobinsiaanna idinto a pinagyamananna da House Deputy Speaker Eric Singson, Deputy National Security Adviser Luis “Chavit” Singson ken Gov. Deogracias Victor “DV” Savellano gapu iti suportada iti naisayangkat a serbisio ti salun-at.

Kabayatanna, inwaragawag ni Deputy Speaker Eric Singson nga agtultuloy dagiti programana a pannakaited ti libre nga operasion dagiti kadistrituanna a naopera iti Philippine General Hospital, Lung Center, Heart Center, Kidney Center ken dadduma pay nga ospital iti Kamanilaan.

“Adda latta mailatlatang a pundo para iti salun-at ta talaga a ti salun-at dagiti umili ti ipangpangrunatayo a kitkitaen,” kinuna ti diputado.#

Comments are closed.